FALAM : Vaar lilawn ahmat 2 On-Puai tuah suak – VIDEO

Kum 2018 ihsin sak thok mi Falam-Kalay kar lak ih um Vaar lilawn ahmat 2 cu October 27, zaanlam ah Chinram cozah bawi upa tamzet tel in tluangten onpuai an tuah suak thu theih a si.

Vaar lilawn ahmat 2 on-puai ṭan nak ah Rev. D. Vai Lian Zul in thlacamnak a nei ih ṭuanvonei upa pawl in lungawi thusimnak an nei hnu ah Chinram CM Pu Salai Lian Luai, Siipin bawi U Soe Htet le Lamziin pehtlaihnak zung bawi U Sui Ṭhio te pawl in hri cep cat in Vaar lilawn ahmat 2 cu an ong suak a si.

Vaar lilawn cu Saklam Laitlang ih um Falam, Hakha le Thanthlang khua pawl hrang ih ei le in ṭulhei poimawh lak bik nak Sagaing fehnak ziinpi ah a um ih Lilawn ahmat 1 cu Kum 2015 tilian ṭum ah ṭihnung dinhmun tiang a rak thleng ruangah khar lawk a rak si dah.

Cuih ṭum ih hmuhtonmi harsatnak ruangah Vaar lilawn ahmat 2 cu sak suak a siih, tui ni October 27 ah Chinram cozah in Official in onnak an nei a si.

Vaar lilawn thar ahmat 2 cu 557.77 feet sau, feet 30 kau le tilian ṭum ih tidai kaiso ri hnak ih feet 9.843 sang ah an don mi a siih ting 4050 kyat cemliam ih sak mi a si.

Leave a Reply

Your email address will not be published. Required fields are marked *

error: hahahahahaha !!