Falam Tualsungum Mino Au-aw cu ramleng um Mipakhat in hitin a Let

Falam Mino Pawlkom zarhtin Cazual ih nganmi tualsung um mino pawl ih Au-aw “Falam in a Ṭul/Ṭullo” thawn pehpar in hmuhdan a phunphun a suak.

Abikin “Falam In A Ṭul Lomi” timi thulu hnuai ih pakhatnak “Falam Khua/peng ah hmuah Inn le Lo din paih siloin Falam ih Parnak tlan ve tum ringring pawl Falam in a lo ṭul lo!” thuthawn pehpar in ramleng um Falam mi ṭhenkhat in hmuhdan a phunphun an ngan.

FMP zarhtin Cazual suahmi ah …
“Falam Khua/peng ah hmuah Inn le Lo din paih siloin Falam ih Parnak tlan ve tum ringring pawl Falam in a lo ṭul lo!”

Hmuhdan a phunphun tarlang a simi lakah Chin TV International dinsuahtu pubik pakhat a simi Pa Ngin Za Pum cun hitin a ngan.

“Tu baite ah Falam mino pawl ih au-Aw ca an suahmi le tuhlan kum tawkfangin Laihlum hrekkhat ih au theumi cu… laihlum lo, inn le lo din lo in Falam parthlum feem tum pawl kan hei lo titu an um theu.

ASSK hi ram dangah kum reipi a um, ram dangmi pasal nei in ram dangah khua asa. A Nu damlo besia kilkhawi dingin ram sungah a ra lut. 8888 Burma pro democracy up raising a um ih a pa mithmai zoh phahin hruaitu dingah an sawm. Cutin harsatnak le buainak tampi cu kum reipi sung a tuar hnu tui dinhmun a thleng ti cu mipi theih a si.

Third country ah Chinmi ting 1 lenglo kan um. Kan Fa le nau pawl tlawng thatha ah fimthiamnak an zir. Cuih a fimthiamnak cu pupa ram sungah hmang duh hngai bang sehla, lamzin a ong awlo vek a bang.

Mizoram remdaihnak le lungrualnak thupi ah ret in dinglai CM Lalthanhawl in MNF hotu pu Laldeng tokham a kian ti thuanthu ah kan hmu thei.

Lai a hlum ih inn le lo a din le lawng, hruaitu an si thei tivek lungput hi kum zabi 19 hrawngih khurkhua ruah daan asi pang maw tin khua ka ruat.

“Falam mi cu hruaitu tha nan nei thei lo ding, hruaitu nan nei veten a ke nan phelh, nan hnuk nan dir nan cai theu” a titu Dr. Vum Son tongkam ka mang.

Falam faa khua dangdang le ram tin ih vakvai pawl hin Falam kan ngai daan, kan lunglen daan le kilkip ih a thanso ve ding kan duh daan hi laihlum pawl hnak in a niam ce cuang lo ding ti cu ka rel ngam. Leilung ka cum thelh lo ding. Mi ram an thansoh daan hmu le theitu sinak dinhmun in…… Mawhthluk awk lam cu si lo ee, seherhnak thu ruangah sawn asi.

Siarpeh : Falam in a Ṭulmi le Ṭul lomi – Tualsung Mino Auaw

Falam khua hin ṭulsammi tamzet le thil ṭul lo tamzet kan nei ih tualsung um mino pawl ih Auaw ṭhenkhat kan run tarlang ding.

Falam in a Ṭulmi

1. Falam duhdawtih Cozah hna a ṭuantu
Cozah hnaṭuantu in kan khawpi an duhdawt lo a si ahcun kan khua le kan ram cu a ṭhangso theinak lamziin dang a um tuk lo. Curuangah Falam a duhdawtih Cozah hna a ṭuantu Falam in kan ṭul.

2. Falam duhdawt in Company hna a ṭuantu
Company hnaṭuan tu hi kan tam vivo. Asinan ram duhdawtnak tel loin hna an ṭuan a si ahcun ram ṭhat tertu si lam loin ram siat tertu an si riangri thei. Curuangah Falam khua/peng mawi ter le ṭhangso tertu ding hrangah cun Falam duhdawtih Company hna a ṭuantu Falam in kan ṭul.

3. Motor, Motor cycle mawng mifim kan ṭul
Kan Falam hi kan khua a pi vivo thlangih kan lamziin khal a ṭha zet thlang. Sihmanseh cak zetih Cycle mawng le Motor mawng ding tiang in cu kan lamziin in a tlin lo tikah khuasung ih cycle mawng le Motor mawng tu hi mifim kan ṭul ngaingai. Mi ka pah pang thei, ka khawng pang thei timi ruat thiamin khaw sungah dimten Motor siseh Cycle siseh ruahnak nei zetih a mawngtu mifim Falam in kan ṭul.

Falam in a Ṭul lomi

1. Falam Khua/peng ah hmuah Inn le Lo din paih siloin Falam ih Parnak tlan ve tum ringring pawl Falam in a lo ṭul lo!

2. Cozah hnaṭuan si Cozah le Mipi (ram) ṭhanso ding hnakin mai` Hlawknak lawnglawng hawlih Cozah hna a ṭuantu pawl cu Falam in a lo ṭul lo!

3. Company hmuah din, hnaṭuan hmuah ngah ringring nan hnaṭuan ṭha ten ṭuan ti um dah lo pawl Falam in a lo ṭul lo!

Editor hnen cakuat
via
Falam Mino Pawlkom zarhtin Cazual

Leave a Reply

Your email address will not be published. Required fields are marked *