Falam thuthawn pehparmi Facts Check mi ah Falam Mipi lungawi tawklo

February 28, Falam palik i mithil tlak bomb an kap ni ah online cahmai pawl ah mipi thinlung buai tham tertu zuk phunphun a suak ih cuih zuk thawn pehpar in CH daily news in facts check nak a nei.

Cumi pawl cu …
1. Feb 28, 2021 ih Falam mipi duhphorhnak ah meithal a kaptu palik cu Steven a si tiah fb cahmai hrekkhat ah a darh. CH ih zingzoinak ah Steven cu cumi ni ah cozah bank ih duty ciahmi a siih cunah ah sunvu a um ti’n kan thei. Curuangah fake news a si.

2. Falam Vankau ralkap umnak ah so in mi hektu cazin tiah mi 4 hmin tarlangmi khal Feb 28 ihsin fb ah thandarhmi hmuh a si. Feb 1 ihsin vankau ralkap camp cu a leengmi zohman lut thei lo dingin gate khaarmi a siih an ralbawi hnen thu kan sut tikah ah Falam ah ralkap hnen ih heekmi le heektu an um lo tiah a sim.

3. Feb 28 ih Falam duhphorhnak ah khua nu/pa țuanvo nei pawl le Pu Ca Awi tei’ zuk tarlang in “ralkap lam țang” ah nganmi khal a pawt. CH ih thuhla zingzoinak ah: mipi pumkhawm thok ah khua nu/pa pawl an ra ih, “tuni cu rampi huap in mipi țhențheknak a um ding ruangah pumkhawm lo dingin an sim” tiah theih a si. Khua nu/pa upa pakhat in, “kanmah lam cun mipi himnak hrang kan simmi si na’n fb post tu in ralkap lam țang tiah in nganmi a si” tiah a sim.

Hih facts check nak thawn pehpar in a tlun lam ih tarlangmi bung 2 le 3 nak thu ah mipi lam an lungawi tawklo.

Bung 2 nak thu ah “ralkap cun report tu um khal sehla an rellang lo ding. Cun tulai cu technology san a si ih, ralkap hnen i report tu cu vankau ah kaiso kher ṭul loin phone in a report theih thotho. Curuangah himi report thuthawn pehpar in ruah ding tampi a um. Facts check mi hi a kim tawk lo” tiah mipi lam in FB cahmai ah an tarlang a si.

Bung 3 nak thu khalah “Falam khua nu/pa pawl hin hmuh theih rorin ralkap an ṭan kan ti lo. Asinan ralkap uknak dodal dingin CDM hrang hmalaknak nei rero mi cu tha an pe lo. Cuhleiah khuadang ahcun ralkap uknak dodal nakih hmaihruaitu hi khua nu/pa pawl an si. Nan, kan nih Falam khua nu/pa pawl cun in ngaih saklo ih an mah thawn pehparnak umlomi vekin dung in tun men. Cuvekih an um mi cu ralkap ṭanpi timi thawn danglamnak a um lo” tiah mipi lam in FB cahmai ah an tarlang a si.

Leave a Reply

Your email address will not be published. Required fields are marked *