Falam : Thla 4 sungah Siizung ih um Covid 19 mina 28 an kim

Thla 4 sungah Falam khuapi ih hmuhsuahmi Covid 19 mina 28 an um zo

Mina tamsawn cu Falam tualsungum siloin hmundang ihsi Falam khuapi an ra pan nak ih hmuhsuahmi an si ih 2020 October thla ah mina 4, 2020 November thla ah mina 6, 2020 December thla ah mina 7, Kum 2021 January thla ah mina 11, Zatekom mina 28 an si.

“Kan dung kum sung cu kan tualsung ah nat nei an um lo. Nan, 2020 kum tir in kan Falam tualsung ah Covid nat a thleng.”

“Tuini tiangah Falam Siizungpi ih zohkhenmi Covid 19 positive mina 28 an um zo. Asinan Pathian zangfahnak in thihhlohtong dinhmun kan thleng hrih lo” tiah Falam Siizungpi ih hnaṭuan mipakhat in a sim.

January thla tir ah Falam tualsungum mipathum hnen ah Covid nathrik hmuhsuah a si ih an pathum in January 22 ah Siizungpi in an suak zo tiah thuthang kan dong.

Tuini, January 23 tiangah Falam Siizungpi ah Covid 19 mina 28 an um zo tiah theih a si ih Siizung ihsin suakzotu mipum 22 an um zo ruangah atufang Falam Siizungpi ah Covid 19 mina 6 an tang a si.

Leave a Reply

Your email address will not be published. Required fields are marked *