Falam, Surbung Vanzam tualrawn On puai tuah cing ding

‘Tuahsuak ni teh um ngai leh pei maw’ tiin, um suak thei ding saduhthatnak lungput thawn kan pu-pa pawl ih rak sial cia mi Surbung vanzam tualrawn cu zaṭek 98 ṭheh suak a si zo ih, tu thla, October 2020 sung ah on puai tuah tum a si thu Sipin bawi U Soe Htet in a sim.

U Soe Htet cun “bawi upa man caan bat in Surbung vazam tualrawn cu October thla sungah on puai tuah tum beisei a si. October 1 ah vanzam ṭum sin dingin tawlrel a si nan nikhua sia ruangah kan tuah suak thei lo” a ti.

2020, June 25 ihsin 27 karlak ah vanzam ṭum tik ih buainak um lo dingin Flight check an nei zo ih vanzam ṭum/kaiso tik hrang ih ṭih nung thei mi Tlang bawk pahnih a um lai ruangah remṭhat saal in hna an ṭuan rero zo ih, tu ah, zaṭek 98 ṭheh suak fel a si zo.

Cumi thu ah, U Soe Htet cun, “zaṭek 98 ṭheh suak a si zo ih vanzam ṭum/zamsuak tik ih dawnkham thei mi tlangbawk pahnih khal ṭhiatbal rero a si ih an ṭheh sawhsawh thlang, Vanzam ṭum ding a hmabak. Tualrawn cu hmun hran deuh ih um mi a si ruangah tuvek boruak khal ah Harhdamzung lam ih thusuah mi Daan thlun phah in ṭuan peh rero a si” a ti.

Falam, Surbung Vanzam tualrawn cu President U Thein Sein cozah san, 2015 kum ihsin ṭuan peh zom thok a siih Kyat 140 Billion cem in tuah a si. Tipi thuanthum ihsin feet 6000 sang ah a um ih runway ft 6000 sau, ft 100 kau in France le Italy ram suak vanzam ATR-72 phun ṭumnak dingih sakmi a si.

ref:Chinworld
zuk:Piang@photography

Leave a Reply

Your email address will not be published. Required fields are marked *