Falam Siizungpi Eye Ward Thar hrang ah Fund an Hawl Tum

Falam siizungpi ih Eye Ward thar hrangah Siibawipi Dr. Tluang Cung Thang le Falam khua nu/pa hohanak in Fund an hawl tum tiah theih a si.

Falam siizungpi ah Mit lam thawn pehpar mi tuamhlawmnak pawl a um lo ruangah Fund an hawl tummi a siih, hmanrua ṭul mi lei nak dingah Ting 80 hrawng a ṭul tiah Siibawipi in a sim.

Hih thuthawn pehpar in Falam khua nu/pa ṭuanvonei Pu Hrang Lawm cun, “Siizung ah Mit Siibawi a thleng zo nan thilri ṭulmi zianghman a um hrih lo ruangah, Siibawipi thawn thuhla reltlangnak kan nei. Siibawipi cun Eye Ward hrang a ṭulmi cu ting 80 man hrawng a si ding ih ting 60 hrawng hawl uhla ting 20 hrawng cu keimah in ka hawl ding a ti.”

“Kan mah lam cun Ting 60 hawl ding kan siih, Khua nu/pa ihsin Ting 5 a hram thoknak kan nei zo, Ting 55 hawl bet ding a siih, Falam khuasung rinsanmi pawl hnen ah dilnak nei ding kan si” ti`n CH daily news hnen ah a sim ih “Khua sungih rinsanmi pawl hnen ah kan lo ra pan lai ding” tin a cah ta.

Falam Siizungpi ah Mit Siibawi kan nei dah hrihlo ruangah tuvekin thilri pawl ah harsatnak a um mi a siih Siizung hmunhma umlo ruangah Eye Ward khal Siizung saklam Siibawi Quarter sak tharmi, hman sung hrih a si.

ref:CH daily news

Leave a Reply

Your email address will not be published. Required fields are marked *

error: hahahahahaha !!