Falam Siizungpi ah Ralkap pawl umhmun an khuar

Atufang Chinram khua ṭhenkhat ah a tharin ralkap pawl umhmun an khuar tiah theih a si ih Falam Siizungpi khalah March 7 in ralkap pawl umhmun an khuar tiah theih asi.

“Ziang hrang ah an ra um tikhal kan thei cianglo. Meithal hriamhrei an keng ih security hrang ah an ti. Mi 10 hnak ih tam cu an si lo ih ziangtik tiang an um tum tikhal kan thei cianglo” tiah Falam Upa pakhat in a sim.

Falam siizung hnaṭuan zaten CDM ah an tel thluh ruangah Siizungpi ah mina hnihkhat lawng an um ih mipi lam damlo poimawh a um pang cun Falam Charity Clinic an pan thluh tiah theih a si.

Ralkap umhmun khuar thu thawn pehpar in Chin ramkulh, Hakha University khalah March 7 zaanlam nazi 2 hrawng in ralkap pawl umhmun an khuar ve tiah theih a si.

Hakha University ih ralkap umhmun khuar thu ah Dr. Lian Za Khup cun “ziangruangah ti ka thei ve lo. Ramkulh council lei i tawlrelmi a si ding” a ti.

Asinan, Chin State Administration Council Chairman Pu Ngun San Aung khalin a ramsung ih thilthleng zianghman a theilo thu a sim ih “Kei cun zianghman ka thei lo. Thuhla zianghman in sim than lo. Atu an kilmi hi cu security hrang ah si ding ka zum” tiah a ti. (The Hakha Post)

Leave a Reply

Your email address will not be published. Required fields are marked *