Falam Seenpi Run Inn on-puai tuah suak – Video

Chinram san thuanthu ih Seenpi Run Inn thupi pakhat a si mi, Falam Town Hall (Falam Seenpi Run Inn) sak thar sal mi cu January 2 ah Chinram cozah bawi upa tamzet tel in tluangten onpuai an tuah suak thu theih a si.

Falam Seenpi Run Inn onpuai cu Zinglam nazi 10 hrawng ah Pastor Thawng Awi thlacamnak thawn an ṭan thok ih ramkulh Chief Minister Salai Lian Luai in Town Hall thuanthu tawi le thucah simnak a nei.

Chinram siipin bawi U Soe Htet khal in lungawithu le thucah tawi simnak a nei hnu ah CM Salai Lian Luai hohanak in Falam Seenpi Run Inn cu hricepcat in onnak an nei a si.

Tualsungum rinsantlak upa pakhat cun “Zing ihsin kan cangvai thok ih kan phurtuk takah bang` khal kan thei lo. Zinglam nazi 10 luan hrawng ah Chinram upa bawi ṭhenkhat, Siipin ṭuanvonei ṭhenkhat le Khua nu/pa upa ṭhenkhat telin Falam Seenpi Run Inn cu onpuai tuahsuak a si” tiah a ti.

Falam Seenpi Run Inn thar cu Dr. Run Bik tawlrelmi India Embassy bomnak le Kum 2019-2020 Chinram cozah budget belhkhawm in Aroma Rose company in a sak suak mi a si.

Dot 3 in saksuak a si mi Falam Seenpi Run Inn cu tluntabik ah Seenpi Hall, a sangtu ah Siipin zung le leirual ah mawṭaw retnak le zungpawng tlannak tiah saksuak a si ih 100x72x34 pee sau,kau,sang in a sak nak ah Kyat taan 850 an cemliam a si.

Leave a Reply

Your email address will not be published. Required fields are marked *