Falam, SAC ralhraang Thinphang thok

Falam, Lumbang kiang ih Doawknak a suak hnu ni 5 nakah SAC ralhraang cun Lumbang khua ih license nei Lai meithal 18 an lak sak tiah theih a si.

SAC ralhraang 20 luan cu tuizing May 25, zinglam nazi 11 hrawngah Lumbang khua an thlengih license nei Lai meithal an khongkhawm hnu ah Khuasung lamziin hnaṭuan pawl thawn khal caan reizet an biakaw tiah khuami pawl in an sim.

Chinram boruak thlirtu ṭhenkhat cun hitiih SAC ralhraang cangvaihnak an nei cu Lumbang kiangih doawknak vek a suak sal tikah nehnak co thei dingin lamziin an sial mi a si tiah an sim.

SAC ralhraang cun April thlacem lam khalah Falam peng sungih license neilo meithal pawl cu May 10 netabik ah retin palik zungah ap thluh dingin Khuabawi le Venglal hnen ah thuthannak an nei dah.

Cuiṭum khalcu Mindat ih Doawknak a suak hnu SAC ralhraang tamzet an thi ṭum ih thusuah a si ih, Chinramum mipakhat cun “Mindat kahdonak ah mipi lam in ralkap an that tamtuk ruangah an thinphang bik si ko” tiah a rak sim dah a si.

May 21, Lumbang kiangih doawknak ah CNDF in SAC ralhraang 6 an that thu le an lam khalah nunnak liam pakhat a um ve thu tlangthannak an nei a si.

Leave a Reply

Your email address will not be published. Required fields are marked *