Falam pi a thosal leh ko ding – Dr. Run Bik

Tuini 12-1-2021 zing cu ni dang vek si lo in zing nazi 4-40 AM hrawng ah ka ṭhang ko. Asinan Dawrhlun I kan inn hi a hung thuk I,Falam mei a kang ti ka thei riar lo. USA ihsin kan inn I ka tupa Sum Luai cu Kiam Si inn a kang tiin an run sim lam.

Hmun so ke I hung soh a ṭul thawn ka hung thlen cun nazi 5-20 AM hrawng a si ding. Milai an rak tam lawlaw. Kiam Si inn kawt ihsin ziinpi thlang tluan ah milai pawl cu tlar 3 in an tlaraw I, a thlang lam isi tiipung in tidai an hun pekmi cu a sangsang in an pe aw. Cule tiipung lawng pawl cu Kiamsii inn lam tlar ihsin a thlang lam ah an pe thla leh. Kei tla ka tlaraw I a saklam I tipung tidai hun pe na, a thlanglam ah tiipung lawng pe thla na ah minute 30 lai cu ka ṭuan ve I ka lung a kim zet. Hnatlang ṭuan nauhak bikcu kum 10 hrawng mipa nauhak a si.

Hi tawk i lohaa pe (free labour pe) pawl ah Kawl, Teddim le miphun kip kan tel thluh. Pu No Zam (Pastor Mang Hlei Zing pa I inn) a kang thluh ka hmuh tikah kan dung lam kum 50 lai I Pu No Zam ka rak kom mi pawl kha ka mang sal I ka lung a zur I ka mitthli a hal.

Falam um miphunphun an ṭan tlan ka hmuh hin lungawi lam ah ka lung a zur la la. Sayama Mang Hlei Zing an hlam cel cel. Mang Hlei hi ka farnu Than Kip i rualpi ṭhazet a si. Cule hna malte ṭuan si rilrawng ve cu lakphak dawr ah hmuk eiin Sayama Bawi Nei te Mang Hlei umnak an theih pangah tiin ka va feh i,tu te ah a ruak le a umpinu Rah Zing I ruak an hmu zo ti in rak sim.

Aw le, tui zingah Falam le Lungpi I um meithat motor pawl um lo sehla cu tui inn 6 lawng siloin inn tampi a kang ding ticu a fiang tuk. Hiti cingin fire bridge motor pawl hi Van Kau ihsin Kambawzah bank lam I ra suk lo in Taungzalat zekta lam in, cui hnu ah Cinmual Tuak Sang pai` inn lam in an run kel, cuti a si ruangah KBZ lam I rat hnak cun minute 10 cun an tlai teng teng ding.

Minute 10 sung ahcun mei tampi a rak kang man ding. Meikang ka ṭih ruangah hi KBZ Vankau zin hi kauh ding a si tiin Chinland Herald le Lairawn Post khal ah ka ngan dah. Falam mi in kan dung kum 5 sungah chief minister kan nei lo maw si. Construction Dept. lam ah Falam mi officer sang kan nei lo maw si. Cule Township Admin ah Falam mi officer kan si lo maw si.

Cui ruangah mei a kang cun tidai phur motor feh that theinak ah lamzin a kauh a ṭul. Lansung Ngun Luai innsak le FBC biakinn ziinpi tui feet 20 lawng I kau hi feet 6 i ti kau theih a si ih a thlang lam ah feet 2 i tikauh theih a si. Cuticun feet 28 a kau ding. A tlun I FBC tual tu ih feet 30 I kau cu feet 24 a kau lai ding.

Zinkauh hmanhmawh zet ding leh cu tui No Sun le Mang Lian Ham inn pawl kawt I feet 6 tal I kauh ding hi a si. Himi zinkap ah inn kang sehla fire motor pakhak hman harzet in a lut their fang fang ding. Hitawk kauh ding ti tla Falam Post kan ṭuah ihsi kan dung kum 6 lai ah ka rak ngan theu.

Cule Falam I Catholic kawhhran cun meikang tuar pawl hrangah Kyat ting 30 an bom zo. Leitlun Falam mi hmuah hmuah kan tang thlang ding I Ks.ting 500 tal kan hawl suah a ṭul ding.

Aw le, tuizing vek in Falam pawl kan tang thlang kei, cui tlunah acozah lam in KBZ bank -Van Kau zin, Lansung zin pi 26 tal I kau ding le No Sun-Mang Lian Ham inn kawt pawl in tuahsak zang thei sehla. Hiti a si ahcun Falam cu kan tho sal leh thei ko ding. (Dr. Run Bik ngan mi a si)

Leave a Reply

Your email address will not be published. Required fields are marked *

error: hahahahahaha !!