Falam khua, Lungpi veng (Rialti) ih mithiruak an hmu cungcang thu um cin – update

October 23 ah Falam khua, Lungpi veng (Rialti) ih hmunram thianfainak an tuah lai ah zo a si ti theih lomi miruak pakhat an sar ih cuih thuthawn pehpar in tualsungum mipakhat cun hitin a rel.

“October 13 ih ralhraang pawl riahnak kiangkap ah hmunram thianfainak an tuah ih mithiruak pakhat an hmu. Arim a nam zet zo ih a taksa a siat thluh ruangah zo a si ti an theithiam lo” tiah tualsungum cun a rel ih “Rialti khuami lakahle mihlo tivek an um lo” a ti.

CNDF lam khalin kan ralkap lakah mihlo tivek an um lo tiah an sim ih “ralhraang pawl Laitlanglam an kaiso lai ah Kawlrawn lam ih CDF kaihtuar miṭhenkhat an hruaicih ti`n kan thei. Cumi lak ihsin an that mi a si pei maw tiah kan ruat. Aruak le a siat tuk zo tikah zo a si ti fiangfai in kan thei lo” tiah CNDF ṭuanvonei mipakhat in a ti.

SAC ralhraangrual cu October 9 ah Laitlang lam an kaiso ih Falam thlen hlan ah Tuphei khuami mipahnih an that ta. An ruak cu lamzinkap ah an hlon ta ih Khuami pawl in an sar leh saal.

Falam ihsin Hakha lam an pan phah ah Rialti, Thlanrawn le Ṭaal khua pawl ah biakinn telin inn 20 hnak mal lo an urkaang tiah kan thei.

Leave a Reply

Your email address will not be published. Required fields are marked *