Falam peng ih SAC ralhraang cangvaihdan an Dem

Falam peng, Ṭaal Baptist biakinn ih ralhraang pawl umhmun an khuar mi thu thawn peh par in Falam Christian Ministers Fellowship in August 19 ah Dem nak ca an suah.

Hmunram thianfaitum phuahlam thawn ṭumhnihnak Ṭaal khua ih umhmun an khuar ṭum ah SAC ralhraang pawl cun khuami thilri an siat sak ih ṭilva rannung an that sak tlun ah Chinmi ih kan ngai poimawh zetmi biakinn thianghlim ah beu in Bible cathianghlim, hla bu le thil dangdang pawl an hlawn sak. Baikinn thianghlim cu bawrhbah ko an tuah ih rimsia celh lo ding khawp in an tanta.

Cuih ruangah cuvek cangvaihnak pawl cu Falam Christian Ministers Fellowship in a Dem thu siseh, biaknak lam ih hmanmi inn/hmunthianghlim pawl cu doawknak thawn pehparmi hmanrua ah hmang nawn lo dingin siseh, ruahban lomi biaknak lam buainak tiang a suak tir theimi suamawknak tuah nawn lo dingin FCMF cun August 19 ni khenmi theihternak ca an suah a si.

Ṭaal khua ah SAC ralhraang pawl ṭumhnih (amalbik) umhmun an khuar zo ih, July thlacem lam ṭumkhatnak umhmun an khuar ṭum ah TV, mawṭaw cycle telin thil mankhung an siatsuah mi le an fir mi thil zatekom man cu Ting 150 hrawng a si.

August zarhhnih nak ih umhmun an khuar ṭum khalah ralhraang thazaang 100 hrawng cun khuami rannung ṭilva an that sak ih biaknak lam suamawknak an tuah hlei ah an siat suah mi inn 20 hrawng cu a thar ih sak saal ṭul ding khawpin an ṭheuhsuah tiah kan thei.

zuk – Eden Studio

Leave a Reply

Your email address will not be published. Required fields are marked *