Falam peng ih ralhraang mithi pawl cu Inn urkaang mi ah an ruak khaang tel cih

Falam-Kalay ziinpi doawknak ih ralhraang ralkap mithi pawl cu felfaiten phum ta loin khawte ih inn an urkaang mi pawl ah an mah ralkappi pawl in an khaang tel tiah theih a si.

CNO/CNDF in Falam peng doawknak thu an suah mi ah tarlang cih a si ih “mithi le hriam tuar an tam ruangah mithiruak cu an mah daan pangaiten Parte khua inn an urkaang mi ah an khaang tel” ti`n an tarlang.

Raldo mawṭaw 2 telmi Ralhraang ralkap mawṭaw 20 lenglo cu May 9 ah Falam ihsin Kalaymyo lam panin an poksuak ih pengban 63 kiangkap ah an cawl lawk.

Kefeh ralkap pawl in hramlak hmunram an thianfai phah ah CNDF bomb kammi an palpuak ih mithi khal umin hriamtuar khal an tam. Cuih hmun ih mithi pawl cu ralhraang ralkap in Parte khua inn pawl an urkaang nakah an khaang tel ti`n CNO/CNDF in thu an suah.

Pengban 55 le 45 kiangkap khalah bomb puah an tuar bet ih mithi le hriam tuar an um. Cuih hmun ih ralhraang thi pawl khal cu Zonglei khua inn an urkaang mi ah an khaang tel cih ti`n CNO/CNDF thu suah mi ah an ngan tel.

CNDF in bomb puak nak kiangkap hmunram thianfainak an tuah phah ah meithal le cerek ṭhenkhat an hmu thu an tarlang ih, “ralhraang ralkap thi 12 hrawng le hriamtuar 15 hrawng an um thei” ti`n May 14 CNO/CNDF thusuah ah an tarlang a si.

Leave a Reply

Your email address will not be published. Required fields are marked *