Falam peng doawknak ah Ralhraang SAC rakap 3 thi

Chin Ramkulh, Falam Peng, Rihkhawdar doawknak ah ralhraang SAC ralkap 3 an thi tiah theih a si ih, rank sang ralbawi pakhat a tel thei tiah CNDF hram pakhat in a rel.

“Zinglam nazi 6 hrawngah a si. Ralhraang SAC ralkap hmunkhuarnak kan kap. Ralhraang 3 an thi. Cumi ah rank sang ralbawi pakhat a tel ding zum a um. Kan nih lam kan him” tiah CNDF hram pakhat cun KTM hnen ah a sim.

Tualsungum mipakhat khalin “zingpit ah hriamkai kopaw pawl in ralhraang sakhaan an kap ti`n kan thei. Khatlamral ihsin an thawmvang a ring zet, nazi khuai ṭha hrawng a rei ding” tiah a rel.

Kahawknak lam hoih ih zukmi video tawi khal online ah a darh.

Kan dung zarh khalah India-Myanmar ramri ih um Rihkhawdar kiangkap ah Chin ralkap le ralhraang SAC ralkap an doaw ih kahdonak ah ralhraang lam amalbik mi 10 an thi tiah theih a si.

Tuini, March 12 doawknak thu thawn pehpar in ca kan ngan tiangah Chin ralkap pawl ih thu felfai an suah hrih lo.