Falam peng, Zawlpi Khuathar Pacangno an kap that

Kalay peng ih ram haal, ralhraang SAC ralkap in Falam peng, Zawlpi Khuatharmi Pa Za Hum Mang, kum 37, an kap that ih a ruak urkaang ziamral cih.

Amah hi CDF/PDF ralkap a si lo nan CNDF thuamhnaw hrukterin mipi ralkap sivekin internet cahmai ah a ruak zuk an darhter.

Thuamhnaw pangai thawn a hmel langtuk loih zukmi le a hmel langterin CNDF thuamhnaw an hruk termi zuk pawl cu internet cahmai ah darhterin PDF/CDF ralkap 2 kan that ti`n ralhraang ralkap in thuthang an darhter.

Amah thawn naivaitu mipakhat in “kawl ralkap pawl in ram an haal ih khawsung ah an lut. Thinphangin mino le pacangno pawl an tlan thluh ih, cumi ah Pa Za Hum Mang an kap that.”

“Fanau panga nei a si ih upabik hi kum 12 hrawng, nautabik hi kum 1 hrawng a si. Amah hi hriamkai a si lo nan PDF a si ti`n an pholang. Aruak khal a sungte`n an ngah lo. Ralhraang ralkap in an urkaang ziamral” tiah a ti.

Ralhraang ralkap lam cun ram haal nakah PDF ruak 2, ralthuam tampi le bungrua dangdang kan lak ngah ti`n internet cahmai ah thuthang an thlah.

Leave a Reply

Your email address will not be published. Required fields are marked *