Falam : Palik in Mino Hruaitu ṭhenkhat an hawl tiah thuthang suak

Falam : Duhphorhnak ih telve hruaitu ṭhenkhat cu February 11 zaan ah palik in an hawl tiah thuthang a suak ih atu ah Falam Mino hruaitu ṭhenkhat cu hmun him hawl in beunak an hawl tiah theih a si.

“Zaan hnu ah thuthang kan thei. Atu hi mino hruaitu ṭhenkhat cu an relh tiah kan thei. Lamzawh duhphorhnak nihnihnak zaan khal ah cutin thuthang a suak lawk” tiah Falam tualsungum mipakhat in a sim.

Ralkap in February 1 zing ih rampi thuneihnak a la hnu ah ralkap uknak duhlonak lang terin Falam khuasung ah FMP hohanak in lamzawh duhphorhnak voi 4 an nei zo.

“Nikhatnak duhphorhnak kan nei ni ah palik pakhat in uniform hruh loin video in zuk rero. Tuizaan thuthang hi cumi thawn teh a pehpar aw pei maw ti cu kan thei ve lo” tikhalin tualsungum mipakhat cun a sim hrih a si.

Ralkap uknak hlon tum in rampi huap kawlram mipi in hmuntinkim ah lamzawh duhphorhnak in siseh, CDM neinak in siseh cangvaihnak nasaten an nei ih cuih cangvaihnak ruangih kaihkhih tongtu an tam zet zo a si.

Leave a Reply

Your email address will not be published. Required fields are marked *