Falam mipi` Duhphorhnak a Rah suak thok zo

Kawl ralkap uknak dodal duhphorhnak le Falam cozah zung hnaṭuan pawl CDM ah telve dingih nornak cu Falam mipi in an nei pehzom vivo ih, tuisun February 25 khalah ni 14 nak lamzawh duhphorhnak an nei.

“Teimak suah in mipi kan cangvainak thawng ah cozah bank ih hnaṭuan mipakhat khal CDM ah a tel thok zo. Cozah zung hnaṭuan a tang dang pawl khal intelpi cing ding tiah zumnak kan nei.”

“Cozah zung hnaṭuan pawl hin ralṭha zetin CDM ah in telpi lohli thei hai sehla ralkap uknak cu kan neh thei lohli dingih kan rampi kan tungding sal thei ding” tiah Falam mino pakhat in a sim.

Falam cozah bank ih hnaṭuan CDM teltu mipum 13 an si thlang ih a tanglai pawl khal CDM ah telpi thlang dingin mipi lam in nasa zetin an nor ih, tuisun khalah Falam mipi cun Bank hmaiah CDM hrang tohnoh duhphorhnak an nei.

Lamzawhtu mipi cu Bank hmai ah duhphorhnak caan tawkmawi an hmang hnu ah Cinmual ih Falam Pengṭhen Fimzirzung hmai khalah duhphorhnak an nei pehzom tiah theih a si.

Falam Pengṭhen Fimzirzung hmai ih duhphorhnak ahcun hruaitu ṭhenkhat in thapek thucahtawi simnak khal an nei ih Rock siangpahrang Solomon khalin thapek thusimnaktawi neiin caan a hmang tiah theih a si.

Leave a Reply

Your email address will not be published. Required fields are marked *