Falam Mipi Hrangah Zawn In Ruat Sak Hram Uh

Falam khawpi karhsin ding hrangah le Inn le lo nei hrih lo pawl hrangah ti`n zawnruahnak thawn tlun-lam thuneitu pawl in inn-hmun ong (phuan) ding tiah tumtahnak an neiih lungawiza ngaingai a si.

Inn-hmun ong thei dingmi hi hmun 700 lai a um, asinan tu hrih ahcun zinpi kap lawng hi ong theih hrih le phuan remcang hrih asi ding ruangah hmun 247 lawng a si hrih ding.

Himi ah, pakhatnak tlar (3,000,000 kyats), pahnihnak tlar (2,000,000 kyats) le pathumnak tlar (1,000,000) tin ong/zuar ding a si. Hi inn-hmun phuan mihi inn le lo nei hrih lo ngaingai pawl hrang zawnruahnak ih on mi deuh bik abang, amah belte inn le lo neithei hrih lo mi harsa pawl hrangah a si ngaingai ahcun aman a tam deuh men thei tihi mi ih hmuhdan a si.

Hmun dang le khaw dang bangin a duhduh hrangah leh a lei theithei hrangah tiin on sibang ta sehla ting 30,20,10 timi cu Falam khaw sungah a lei thitu ding an tampi ko ding. Ting 30 man hman pa-hra lai a lei theitu khal an um ruri men ding.

Asinan tuih Falam ih um inn le lo nei lo mi harsa tete pawl hrangih zawnruahnak taktak thawn ong mi a si ahcun a tam deuh ding. Inn le Lo neilo mi harsa tete hrangah sumpai ting 5, 10 timi hman cu ngah harsa zet a si. Falam khaw sungah inn le Lo nei thei hrih lo, lei thei hrih lo mi harsa, mi zonzai hi innsang 500-1000 hrawng kan um ko ding.

Hi ruangah tlunlam thuneitu pawl in tui` an ong dingmi hi innhmun 247 siseh lehhnu ih ong lai dingmi innhmun pawl khal siseh inn le lo nei hrih lo, mi harsa, mi zonzai taktak pawl hrangah a si tiih an co ve, an nei ve theinak ding hrangah tiin zawnruahnak, zangfahnak le duhdawtnak taktak an nei a si ahcun ting 15, 10, 5 tivekin maw, asilole cuhnak ih tam deuh, maldeuh in maw tawlrel sak aw thei daan um thei hram sehla Falam mipi cu kan lung a awi zet ding. Kan hlim kan nuam dingih kan Khawpi khal a ṭhangso ding, a karh khal kan karh cak vivo thei ding.

Falam ih um inn le lo nei lo taktak pawl in an lei thei ve, an co thei venak ding hrangah tawlrel sak thei hram uh tiah ṭuanvo neitu pawl hnenah hih ca hmangin zangfah kan dil ve a si.

via FMP Cazual

Leave a Reply

Your email address will not be published. Required fields are marked *

error: hahahahahaha !!