Falam le Hakha mipi ralring dingih thuthan an si hnu ah Ralkap le Palik an cangvai taktak

Chinram lam pan in ralkap 50 hrawng an kai so ruangah Falam, Hakha, Thantlang mipi ralring cio dingin thuthanawk a si hnu a nikhat nakah Chinram khua ṭhenkhat ah ralkap le palik an cangvai tiah theih a si.

March 24 zaan khua thim hnu ah ralkap le palik ṭhenkhat Falam Hṭii Yeik hmai ah an tongaw ih khuasung hel duty tum vekin cangvainak an nei tum.

Cuvek a si ruangah zaan ah zohman vak suak lo dingin thuthanaw a si ih “Palik le ralkap ṭhenkhat cu ပတ်တရောင် vaak le ဧည့်စာရင်း check tum vekin Htii Yeik hmai ah an tongawk hai. Cycle khaal in vaak an tum. Curuangah, mipi zo hman leng suakvak lo te`n kan um cio pei. Pakhatkhat a um len kan panawk sawn pei” tiah Falam CDM Supporters in thuthannak a nei.

Update : Ralkap le palik pawl in March 24 zaan ah Falam veng hrekkhat pawl ah Mikhual cazin check nak an nei vivo. Kaihkhih dingih warrant an suah zo mi Sayakyi Pa Biak te inn le Saya David New te inn pawl tla an va check nan kaihmi cu an nei lo tiah theih a si.

Hakha lam khalah March 24 zaan thim hnu ah palik le ralkap pawl in kaihkhihmi an nei tiah theih a si.

“Kaihkhih mi runsuak dingin mipi an pung khawm lai ah ralkap le palik pawl in mitthli tlak bomb le rubber cerek an kap. Meithal zian cun mi pakhat ban ah hmun thum in a hnor. Tuhrih tiang ahcun midang hliamhma tuar cu kan thei hrih lo” tiah mipakhat in Facebook cahmai ah a tarlang.

Edit : “Breaking news”
Hakha Town dawr kiangkap in Meithal voi 2 kap puak thawm a thang. Mi hawl mi nei siawm takin Datmei vangin ralkap pawl an vaak an tawi.

Zaan nazi 10 hrawng ah Hakha University ih math Major kai lai fala no pakhat cu inn a tlung lai ah ralkap pawl in an kai.

Amah hi Cherry veng, BEHS No. 1 Tlawnginn saklam Quarters ih ummi Na Na a si. Ralkap le palik pawl in an dawi ruangah a rual nu thawn an tlan ih lamziin an ṭhek aw pang ruangah ralkap pawl in an kai mi a si tiah The Chin Journal in a ngan.

Leave a Reply

Your email address will not be published. Required fields are marked *