Falam : Khukbil in Duhphorhnak neitu an um lai ah Bank rak dawrtu Mino khal an rak um

Ralkap cozah hnukthlak nakding hrang ih hmanfung ṭhazet pakhat a simi CDM cangvaihnak ah rampihuap cozah hnaṭuan tam zet an tel thok vivo ih a tel hrih lo pawl khal mipi lam in nasaten an nor zawk rero.

Falam khalah CDM ih teltu cozah zung/siizung pumpihlum pakhat cu a um nan cozah zung tamsawn cu pangaiten an ong thotho lai.

Cuvek dinhmun kan si ruangah Falam mino hohanak in cozah zung hnaṭuan pawl CDM ah telthok dingin duhphorhnak an nei rero ih tuisun February 23 khalah CDM hrang hmainor in Falam, Economic Bank hmai ah duhphorhnak an nei.

“Tuni khalle duhphorhnak hmun ih minung kan tam man hlan ah zunghnaṭuan ṭhenkhat cu zung an rak kai man thotho. Poi hi kan tituk rori ih ralkap uknak hi an duhsawn si pei maw titiang in kan ruat.”

“Culaiah, zungkailo dingin le cozah zung pawl Dawr loding tiih ka au rero lai ah bank ih paisa suahtu an rak um lai. Tuini khal, tol pong zik ko au in duhphorhnak kan nei rero lai ah bank rak dawr tu an um. Mipakhat tla cu bank sung a lut zik te ah duhphorhnak neitu mipi pawl in ti hrim bet lai” tiah duhphorhnak ih teltu mino pakhat in FOM hnen ah a sim.

Ralkap uknak dodal in Falam ah duhphorhnak voi 10 luan an nei zo ih CDM hrang hmainor in Economic Bank hmai ih tohnoh Duhphorhnak voi 3 an nei zo a si.

Leave a Reply

Your email address will not be published. Required fields are marked *