Falam Khuapi karh Project le Thuthang Leng vaak

CM Pu Salai Lian Luai in Chinram cozah dinhmun ih hnaṭuan mi ah Khuapikarh project (Inn-hmun) thuhla hi tawlrel har ka ti bik a rak ti dah vekin Falam Khuapikarh project thawn pehpar in relsiatawknak le thuhla um dan theih ciang lo tu pawl ih ngan mi thuthang phunphun a suak.

Cuih thuthawn pehpar in Pu Ngun Thawng cun “Falam Town plan hi Laitlang cozah plan pi a si lo. Hakha, Falam le Paletwa ah tuah tum in cozah budget pek a si lo ruangah mahte tawlrel dingmi a si. Asinan thingram department i kuan ṭul mi paisa ting 1400 lenglo cu CM Pu Salai Lian Luai in pi-ne budget sungin a haisuak i leiram department ih thun ding mi paisa ting 260 lenglo cu pek sal ding leiba in U Zung Hlei Thang in a thun sung” ti`n a sim fiang ih “Khawpi pakua a um ih cozah budget pek a si le a dang khawpi paruk in an ngah ve lo ding ruangah an lung a kim lo ding. Curuangah mai khua nuam le ṭhansonak hrang ah mahte titheitawk ti hrih ding a si” a ti.

Falam khuapi karh project ih a hmasabik innhmun phorhsuahmi Tlanglo veng le Cinmual veng ih Inn-hmun 245 pawl cu November 2 ah Siipin le Cozah ṭuanvonei hohanak in camcawhfung zuuknak thawn mipi hnen ah zem suak a si zo.

Innhmun pawl cu Ziinpi kam ihsin A, B, C ti`n a dotdot ten level ṭhen a siih Innhmun level A hrang ah Ting 20, B level hrang ah Ting 10 le C level hrang ah Ting 5 tiin a man khiah a si.

Inn-hmun man ngen mi thu ah “pek ta cengmang cu a lak rorin pek mei ding a si sawn” tiah hmuhdan phorhsuaktu an um ih, cumi thu ah Pu Ngun Thawng cun “Siipin in budget paisa an nei lo ruangah himi paisa hi khawlak (veng) lamziin, tidai, meisa le a dangdang pawl tuah tengteng a ṭul ruangah cui pawl hrang hman ding a si. Innhmun lawng pek a si le hramlak ih um tir vek a si ding” a ti.

“Municipal hi khuiram khalah mahte akhun parih ding an sinan an din thei hrihlo ruangah Laitlang cozah in an pe rero. Cozah pekmi i tuahsak thei kan hngah asile kum tampi hngah a ṭul lai ding. Curuangah mai khua ṭhat tir duh asile ṭan lak a ṭul. Theihthiam a ṭul” ti`n Pu Nung Thawng cun a rel a si.

Falam khuapi karh project ih a hmasabiknak innhmun phorhsuahmi cu camcawhfung zuknak thawn mipi hnen ah zem suak fel a si zo ih a ra lai ding tikcucaan khal ah Inn-hmun dang phorhsuak bet dingin ṭuanvonei pawl in hmalaknak an nei lai tiah thuthang kan dong a si.

Leave a Reply

Your email address will not be published. Required fields are marked *