Falam Khawlak duty tuding Security group din suak

Falam khuapi kilhim dan ding thu thawn pehpar in vengtinkim ṭuanvonei upa pawl cu tuni March 7 ah thu rel tlangnak an nei ih, zate lungkim tlangnak thawn khuapi kiltuding Security group an dinsuak tiah theih a si.

“March 5 ah khawsung inn 3 urkaang tum in ṭhihawknak a um. March 6 ah Laimual lam ah inn pakhat a kaang. A zaan ah khawsung inn 3 a kaang lala. Mipi thlaphang in kan um ih kilhimawk danding ngaih tuah in thu rel tlangnak kan nei mi a si” tiah tualsungum upa pakhat cun a rel.

Zuk – Chinland Herald DAILY News

Meeting kaitu upa pakhat khalin “Falam khuapi humhimnak hi pawlkom/bu pakhat lawngih țuan a ngah lo. Mipi zaten țuanvo laak khawm țul tikcu a siih ziangtin hmalaak tlaang a fuh bik ding tiah kan relkhawmmi a si. Kan tumtah bik khal Falam khuapi humhimnak a si” tiah a sim.

Falam Senpi inn ah thureltlangnak an nei mi a si ih, cuih thurel khawmnak ihsin Falam khuasung veng pawl ah Security group pawl din a siih, ahleice in zaan ah khuapi kilnak pawl an nei thok thlang ding tiah theih a si.

Leave a Reply

Your email address will not be published. Required fields are marked *