Falam innhmun thu ah Zamual Khuami lungawilo, Voihnihnak Ca an Kuat

Falam innhum thar phorhmi thawn pehpar in C. Zamual khuami pawl in an lungawi lonak ca cu khuapi karh cangsuak tawlrel committee hotu hnen ah voihnihnak ca an kuat tiah theih a si.

September 9 ah an kuatmi a siih khuapi karh sungih tel dingin Zamual ram acres 243 an pek na`n ṭuanvo neitu pawl ih thu tiamkam vekin innsang tin hnen ah innhmun pakhat cio an pek saal lo ruangah an lungawi lonak ca an kuat mi a si.

Zamual khuabawi Pu Piang Thuan Thang cun, “kan leiram pawl hi Falam khuapi karh project sungah a tel ruangah Falam khuapi ṭhansonak a si ahcun kanmah lam khal in ṭulsammi innhmun in pek thluh ding an ti ruangah lungawi te`n kan rak pek.”

“Atu ahcun Zamual khua innsang 57 hrangah innhmun 10 in pekmi cu khuami pawl karlak ah hmuhsual awnak sawn ah a cang thluh zik ih kan cohlaang thei lo. Tuhlan ih an thutiam vikin kan khua innsang zate hnen ah innhmun pakhat ciar in pek ding kan duh thu dilnak ca kan thunlutmi a si” tiah CH daily news hnen ah a sim.

Zamual khua ih ṭuanvo neitu pawl cun kan dung August 10 khal ah innhmun 10 si loin innsang tin hnen ah cozah ṭuanvo neitu pawl ih thu tiamkam vekin innhmun pakhat ciar le tlawngta pawl hrang border tlawng saknak hrang acres 1 leiram an duh thu cu mipum 57 hminkhen thawn ca an rak ngan dah zo nan zianghman sawnkirnak a um lo tiah theih a si.

Curuangah atu ah ruat sak saal dingin dilnak an neimi siih innhmun 10 lawng thotho an pek ding a si ahcun leiram acres 234 an pekmi lakkir an duh saal thu cu rampi President hnen ah dilnak an nei tum tiin khua upa pakhat cun a sim.

Atui` innhmun thar 427 an phorhmi cu September 7 ihsin thaisun tiang Tamah zungah dilnak ca pakhat ah Ks. 5000/- in an zuar ih a leitu 500 lenglo an um zo ruangah ting 25 lai an ngah zo a si.

(CH dailynews)

Leave a Reply

Your email address will not be published. Required fields are marked *