FALAM in Kan Ṭul ….

Falam khawsung ah Mino kum 18 tlun, mipum 800 lai kan umih, cuih mino tampi lakah hnaṭuan (permanent/fulltime) nei loih um menmen hi a hrek luan hrawng kan si men ding.

Kan Falam ah Cozah tlaawng ihsin Diploma, BA, MA Degree, Private tlaawng le Bible tlaawng ihsin Degree ngahtu pawl hi siar aw sehla za thum-li lai an um ko ding. Degree ngah thei ding hrangah kum 4-5 lai zirnak thawn caan pek hnuih ngahmi a si tikah a man hla nasa.

Sihmansehla kan khua le kan ram ahcun Degree kan ngahmi hi innsung ih Degree zuk tamnakding fang hrawng lawngah a ṭhahnem a bang? A caancaan ah Kan khua le ram ahcun hnaṭuan ngahnakding hrang ah Degree ngah hnakin sumpai neinak sawnin hna a ṭuan thei deuh ṭheu a bang, hnaṭuan dil ciocio ah Degree ngah le Qualify hnakin sumpai neitu sawnin hnaṭuan an ngah deuh ṭheu a bang.

Hiruangah kan Falam ih um hnaṭuan neilo mino tete hrangah hnaṭuan hawlsak theitu le hnaṭuan a pe theitu Bawi Upa le Cozah hnaṭuan kan va ṭul em. Mipi in MP ding nathlir tikah hivek ṭuansuak theituding kha na thlir thiam le na hril thiam a ṭul.

Falam khua hi karh lam cu kan pan ve rero thlangih Inn-hmun tla zem dingin tlun lam le thuneitu pawl in an tawlrel rero. Ngah ding rori mi pawl in an ngah thei tengteng ding hi, a thupi ngaingai. Cucu Pathian ih duhmi khal a si ko ding.

Cule Inn hmun zem thluh a si hnu khalah inn sak siannak hi awlaiten ngah thei cih sehla a va ṭha ding ve. Kan Falam mipi hrangih a poi zet ṭheumi pakhat cu inn hmun nei cingih sak siannak ngah thei lohlilo ṭheu hi a si.

Ramdang hmundang bangin inn saknak ding hrangah bawmnak ziang hman pek-awk bawmaw theilo khalah innhmun nei hmuahhmuah cun sak thei lohli dingin siannak hi tlunlam thuneitu pawl in awlaiten in pe thei cih in tawlrel sak thei cih sehla, kan khua le ram cu a ṭhangso cak zet ding.

Via FMP Cazual

Leave a Reply

Your email address will not be published. Required fields are marked *