Falam ih Innhmun Dilnak Form Lei Theih Tlang Ding, Lei Danding le Ṭul Dang ….

Falam khuapi karh project ih a hmasabik innhmun phorhsuahmi 247 dilnak form pawl cu August 17 ihsin thla cem tiang lei a theih thlang ding.

Innhmun pawl cu Ziinpi kam ihsin A, B, C ti`n a dotdot ten ṭhen a siih Innhmun A hmun 49 ah hmun 1 hrang Ting 20, B level hmun 121 ah hmun 1 hrang Ting 10 le C level hmun 77 ah hmun 1 hrang Ting 5 tiin a man khiah a siih innhmun ngahtu pawl cun leiram peknak ca ngah hnu ni 5 sungah Bank ah sumpai thun ding a si.

August 17 ihsin 31 tiang Municipal zung ah hnah 1 ah Ks. 5000 in lei theih a si dingih form a leitu pawl cu September 5 ah zohfelnak nei in Sep 7, 2020 ah camcawhfung zuuk in innhmun pek ding a si.

Innhmun diltu pawl cu a tu ah inn, innhmun neilotu a si ding, leiram peknak ca ngah hnu ni 5 sungah innhmun ah mah le ngah mi level vekin bank ah sumpai thun ding, leiram peknak ca ngah hnu thla 6 sungah inn sak tengteng ding, innsang pakhat in form pakhat lawng lei theih ding tipawl in daan tuahmi a um a si.

Biakinn lam, Zatlaang pawlkom lam ih innhmun dilmi a si le register tuahmi, dunglam thu le leiram hmang ding thu pawl a ṭul hrih tiah ṭuanvonei pakhat in a sim.

Innhmun pek ding thu ih co-uu pek daan dingah, Falam khuasung ih Pastor pension pawl, Falam khuasung ih acozah hnaṭuantu pension innhlaang pawl le innsang pawl, Falam khuasung ih innhlaang ih umtu pawl, Falam peng sungih acozah hnaṭuantu pawl le mipi pawl tiin ṭhen 4 ah co-uu pek an si ding.

CH dailynews
zuk : Aung Myat Thu

Leave a Reply

Your email address will not be published. Required fields are marked *