Falam ih Covid 19 mina case no. 29008 in Siizung suahsan, Tufang Falam Dinhmun

Falam khuasung ih Covid 19 mina hmuh hmaisabik cu a taksa par ah nat hrik a um nawn lo ruangah rampi Harhdamnak le Lehpannak zung sian nak thawn October 20 zing ah an tuamhlawmnak Falam Siizungpi ihsin a suak zo a si.

Amah cu Hlawnmual khua mi kum 18 upa a siih rampi hrilawknak hrang kilkhawi danding palik training kai nak hmun SHS No.1 Tlaawnginn ih Covid 19 nat nei maw, neilo an check lai ih hmuhsuak mi mina a si.

Hih thuthawn pehpar in Falam Siizungpi ih hnaṭuan mipakhat cun, “tlunlam thusuah vekin October 9 ah rampi Hrilawknak kiltu ding training kai nak hmun ih mipum 167 pawl cu Covid 19 nat check nak kan nei.”

“Cumi lak ah Hlawnmual khua mi kum 18 upa taksa par ah Covid 19 nat hmuhsuak a si. Falam Siizungpi ah tuamhlawm dingin hruai cih a siih Siizungpi Isolation Ward ah ni 11 sung tuamhlawm in a um. Tu ah, Antigen Test Kit thawn an zoh sal ih a taksa par ah nat hrik a um nawn lo ruangah rampi Harhdamnak le Lehpannak zung sian nak thawn Falam Siizungpi ihsin October 20 zinglam ah a suak zo a si” tiah FOM hnen ah a sim.

Amah cu rampi thusuah vekin ni 7 sung a hran ten zohkhen sung a si ding ih cuih ni sungah a taksa par ih natnak a hlo fai a si le thlah zalen a si ding.

Falam khuasung ah October 18 tiang Covid 19 namhnget mina pali an um ih, nat nei hmaisabik a dam zo ruangah Falam khuasung ah Covid 19 mina pathum an tang a si.

zuk:Falam Siibawipi

Leave a Reply

Your email address will not be published. Required fields are marked *