Falam ih Covid 19 Dokhamnak bungrua ṭhenkhat Ṭio ah an hlu sawng

Falam Covid 19 dokhamnak hrang hmalaknak nei rerotu Falam CRCDF (Chin Relief-rehabilitation and Community Development Foundation) pawlkom in COVID-19 dokhamnak bungrua pawl cu August 6 ah Falam Humhual Pawlkom (FHP), Ṭio hnen ah an hlu sawng tiah theih a si.

CRCDF ih ṭuanvonei mipakhat cun “Rihkhawdar le Țio mipi hrangah bungrua kan dong mi sung ihsin PPE 100, N95 Mask box 10, Surgecal gown 100, Oxygen 15 liter bur 7, Flow meter 5, Oxygen stand 7, Test Kit 25, Oximeter 5 pawl cu Falam Humhual Pawlkom (FHP), Ṭio hnen ah kan hlan ih Falam hrang Covid Test Kit a thleng mi pawl kan va lak cih” a ti.

Covid dokhamnak bungrua pawl cu Falam ihsin CRCDF sungṭuan Salai Nhgepi Thian Uk Thang, CBC ih AGS Rev. Dr. F. Thiam Uk le Pu Zung Peng pawl in FHP, Ṭio ah an va hlu ih tluang zetin Falam an thleng saal zo tiah theih a si.

August 6, Falam Covid 19 mina dinhmun

August 6 ih Covid nat check mi mipum 9 ah positive mina thar 2 an um ih, June 1 ihsin August 6 tiangah positive mipum 516 an um zo.

Falam khuasung ihsin Covid nat nak thawn in cem santu mipum 40 le Laikhua lam ihsin mi 4 an thi zo ih penghuap in Covid 19 mithi 44 an um thlang a si.

Leave a Reply

Your email address will not be published. Required fields are marked *