Falam Harhdamzung hnaṭuan pawl in CDM ih teltu hmin cazin le Theihternak Capi suah

February 1 ih Myanmar kumpi cozah thuneihnak cuhtu ralkap cozah hnukthlak tumin CDM cangvaihnak ih teltu rampi huap cozah hnaṭuan miralṭha ṭhenkhat cun CDM cangvaihnak ih an tel naksan pawl cu cozah le mipi theih dingin an tarlang cio.

Falam Harhdamnak zungih cozah hnaṭuan CDM teltu miralṭha pawl khalin hna bansan le hnaṭuan peihlo ruangih hna an cawl mi siloin ralkap uknak hnuai ih hnaṭuan an duhlo ruangah mah pumcawmnak hnaṭuan rori thaapin CDM ih an tel mi a si sawn thu theihternak Ca ropi an suah.

CDM cangvaihnak thuthawn pehpar in Falam Siizung ih ṭuanvonei mipakhat cun “kan ram tungdingsal dingih lamziin ṭha pakhat kan neih sun a si. Curuangah kan nih Falam siizung ih hnaṭuan pawl khalin kan innsang/sungkhat/unau pumcawmnak hnaṭuan thaap in CDM ah kan tel naksan a si.”

“CDM le lamzawh duhphorhnak khalah kan tel ih palik an cangvaitum tivek thuthang a um ruangah Siibawi ṭhenkhat tlacu February zarhhnihnak hrawng khan an relh lawk. Ziangvek dinhmun kan thleng thei ticu pumpak cio in kan fiangtuk ko nan lotheihlo i tuah ṭul rori tiah kan ruat ruangah CDM ah kan tel mi a si” a ti.

Falam Harhdamzung ih cozah hnaṭuan CDM teltu hmin cazin cu a sangsang ten tarlang a si ih theihternak capi ahcun …

Falam Siizungpi ih hnaṭuan ka rat lo naksan cu ralkap cozah thuneihnak hnuai ah hna ka ṭuan duhlo ruangah a si ih Civil Disobedience Movement ah 8/2/2021 in ka tel thok zo.

Atu khal hi hnaṭuan ka bansan siloin mipi hrang ih hnaṭuantu dinhmun in remdai zetin duhphorhnak ka nei mi a si.

Rampi thuneihnak latu ralkap cozah in mipi hriltlinmi cozah dik hnen ih thuneihnak a up hlan tiang, zung hna ṭuan loin CDM ah ka tel ding ti`n theihternak ka nei a si. Himi cangvaihnak hi party ramkhel cangvaihnak a si lo ih tlunlam bawiupa ziangsiarlo ruangih tuah hrimmi khal a si lo. Ka hnaṭuan hi ka upat hlei ah ka duh zet a si” tiah Falam Harhdamnak zungih hnaṭuan pawl in theihternak capi an suah a si.

Leave a Reply

Your email address will not be published. Required fields are marked *