Falam, Hakha le Thantlang mipi ralring cio dingin thu an than

Myanmar rampi buainak cu a ninii in a zual vivo ih ralkap pawl cun an tumtah mi hluhsuah thei dingin ziin dangdang an hawl ih a phunphun in an cangvai.

Cuvek ruangah le Chin ram lam pan in ralkap 50 hrawng an kai so ti`n thuthang a suak ruangah duhphorhnak nei ringringtu Falam, Thantlang le Hakha mipi pawl cu ralring zetih um cio dingin online ah simthan awnak an nei.

Falam mino pakhat in “March 22 ah khan Falam lamzawh duhphorhnak ah mipi tel lo dingin Tlangthan ralrin peknak ca pakhat an tar. Cuvek ca tarnak le a um zo tikah tuih ralkap 50 hrawng Chin ram pan in an ra so timi hi pehtlaihawknak a nei pang pei maw tivek khal ruah ding a um. Curuangah cangvai tikah ralring cio dingin thuthan awk a si” a ti.

Falam mipi lamzawhnak ih tel lo dingin ralrin an pek nak ahcun “duhphorh cangvaihnak nei zual pawl in March 22 ihsin thla cem karlak tiang a hrang zawngih duhphorhnak nei dingin mi taw an tok ih hriamhrei le ziinan palang tivek an hmang ruangah lamzawh duhphorhnak neitu mipi an hliam ih kangmei suak ding khalin an cangvai.”

“Curuangah mipi lam in cui caantikcu ah duhphorhnak/lamzawhnak ah tel lo dingin le kangmei ralrinnak hrangah lamziin pawl phit/kham lo dingin ralrin kan lo pe” tiah an ngan. Asinan zoi` ca suah mi a si ti an ngan tel lo.

Tlangthan ralrin pek nak ca thawn pehpar in Falam mino pakhat cun “hih ca pawl cu zaan lai ah Falam khua laili le Cinmual ziin pawl ah an tar ciamco. Ralkap/palik pawl ih tarmi khal a si thei ih CDM le lamzawh thape lotu pawl in mipi ṭhih nakah an tarmi khal a si thei. Ziangvek a si khalle kan nih mino pawl cu hmai kan nor hrih ko ding. Nan, tulai boruak cu kan thei cio vekin mallai fimvar deuh cu a ṭul” a ti.

Leave a Reply

Your email address will not be published. Required fields are marked *