Falam le Hakha karlak Kahdonak

Chinram boruak a sosang vivo ih pengtin deuh thaw ah meithal hmet puak a si zo.

Falam ramri Ramthlo le Chuncung karlak khalah May 16 zaan lam nazi 5 luan ah meithal puak thawm a thang tiah khuami pawl in an sim.

Zaanlam nazi 5:30 hrawngin CDF Hakha le SAC ralkap kahdonak a suak mi a si tiah Chinland Defense Force in official in an phuang ih “nazi 2 luan doawknak ah SAC ralkap 6 an thi, 10 luan in hliam an tuar. Ralkap lam in RPG le meithaltum an hmang ruangah CDF – Hakha lam in mipakhat nunnak a liam” tiah an tarlang.

Social media ah meithal kahpuak lai Video file tawi 2 a suak ih khuami mipakhat cun “Chuncung le Ramthlo karlak in meithal puak thawm kan thei. Ralkap mawṭaw khal kan hmu ih bomb puak awn khal kan thei” a ti.

Ram le miphun hrang nunnak liam Paralṭha CDF ralkap cu kum 25 mi pacangno Salai Van Biak Ling a si tiah theih a si ih Chinland Defense Force in riahsiapinak capi an suah.

SAC ralkap le CDF Hakha karlak ah voi 7 hrawng kapawnak a suak zo tiah theih a siih May 16 kahawklai ah SAC ralkap in Chuncung khua kiang ih lamziin hnaṭuan mipakhat an kai tiah theih a si.

Leave a Reply

Your email address will not be published. Required fields are marked *