Falam-Hakha karlak doawknak ah CNA/CNF ralkap 2 nunnak liam

Falam-Hakha karlak, SAC ralhraang le hriamkai ṭangrual pawl doawknak ah CNA/CNF ralkap 2 in ram le miphun hrang nunnak an hlan.

Ziangtikṭum ih nunnak liam ti cu tarlang a si lo nan, tuizing March 2 khalah Dokṭhek khua kiangah SAC ralhraang le hriamkai ṭangrual pawl nasaten an kap aw tiah theih a si.

Ram le miphun hrang nunnak hlantu CNA ralkap paralṭha mipahnih cu Salai Van Bawi Bik le Salai Za Hnin an si ih Thantlang peng Dawn khawmi le Ralpel khawmi an si.

Kawlrawn ihsin Falam, Falam ihsin Hakha lam pantu ralhraang ralkap pawl cun Falam peng khalah inn tamzet an boh hlei ah CNDF colhlasung ralkap pakhat rapthlak zetin an that.

Lamtluan ah Hriamkai ṭangrual pawl in an kap phahphah ih kahdonak ah ralhraang lam khal hriam tuar an tam ding tiah zum a si.

Ram le Miphun hrang nunnak hlantu CNA ralkap 2 thu thawn pehpar in atu ca kan ngan tiangah CNA/CNF in thuthannak an nei hrih lo.

Zuk : 2018 – CNA/CNF ralkap cangvaihnak

Ralhraang SAC ralkap in Dokṭhek khua Urkaang

Siarbet : Ralhraang SAC ralkap in Dokṭhek khua Urkaang

Falam-Hakha ziinpi ih um Dokṭhek khua cu ralhraang SAC ralkap pawl in March 2 zaanlam nazi 5 hrawngah an urkaang tiah theih a si.

Kawlrawn ihsin Chinram rakaiso, SAC ralhraang mawṭaw tlar cu atufang Falam-Hakha ziinpi ah an um hrih ih, lamtluan ah Chinram hriamkai ṭangrual pawl thawn an kap aw phahphah.

Tuni March 2 khalah Ralhraang SAC ralkap le Chinram hriamkai ṭangrual pawl nasaten an kapaw tiah theih a si ih, Ralhraang in Dokṭhek Baptist biakinn khal an kap ngah tiah an rel.

“Falam ihsin ralhraang pawl an poksuak thu kan thei veten Falam-Hakha ziinpi ih um khawmi pawl cu sahimnak hawlin kan tlanhlo thluh.”

“Lamziintluan ah innboh thilfir in an khawsa ih tuzaanlam khalah kan khua inn an urkaang” tiah tualsungum mipakhat cun a rel ih “hmunhla ihsin kan hmu mi a si ih inn ziangzat a kaang ti cu kan thei lo” tiah a ti.

Leave a Reply

Your email address will not be published. Required fields are marked *