Falam : GTI Phunsang Tlawng sak nak ding Hmunhma an hal

Chief Minister Salai Lian Luai le Chinram cozah ṭuanvonei ṭhenkhat cun January 3 zarhpi zing ah Falam, Zalai veng ih Government Technological Institute (GTI) tlawngpi sak nak ding hmunhma halnak an nei.

Hih hmun ah phun 8 ong pawl kaai theihmi GTH tlawng rak sak dingin tumtah a si na`n, cuih tlawng cu Thantlang ah sak a rak si ruangah phun 10 ong pawl ih kaai dingmi GTI tlawng sawn an sak tummi a si.

Hmunhma halnak ah Chin ramkulh cozah tuanvonei Pu Soe Htet, Pu Pau Lun Min Thang le Pu Lal Tin Mang te pawl in an telpi ih Hakha GTI tlawng sayakyi Dr.Tluang Za Thang in tlawnginn sak tum dan pawl simfiangnak a nei hnu ah CM Salai Lian Luai in ṭulsammi le tuah ṭul mi tete simnak a nei vivo.

Hih phunsang tlawnginn cu 2020-2021 cozah budget ah tumtah telcihmi a si ih cazirnak innpi 162`x 38` sau, kau dot hnih innpi cu Aroma Rose company siseh, a kulh nak pi 4000 sau hruang cu Cherry Par company in siseh ṭuanvo an la ding a si.

GTI tlawnginnpi cu cozah kumpi budget zir in cazirnak, hnaṭuannak, hnaṭuan pawl umnak, tidai, meisa, Lamziin tvk pawl tawlreltum a si ih 2023-2024 budget kumpi ah on ding beisei a si thu Hakha GTI tlawng sayakyi Dr.Tluang Za Thang in a sim.

Leave a Reply

Your email address will not be published. Required fields are marked *