Falam : Daan pahbal in a thupten Vok an that nak san

Tulaifang Falam khuasung ah a thupten vok that an tamtuk ruangah cozah siannak licence thawn Bazar ih Voksa zuar tu pawl in sungralnak an tong.

Hih thuthawn pehpar in Voksa khung lilam ngahtu Nu Phir Thlia in a thupten Vok that pawl cu nasatak in cawhkuan pek dingin Falam Vuanthokbawi hnen ah ngennak ca a rak kuat nan mipi lam cun a thup ten an that ringring thotho.

Curuangah Daan lo ih vok that hi a ṭha lo, Daan pahbal thil ṭihnung a si ti thei cingin ziang ruangah kan that thotho si pei timi theisuak thei dingin Falam Mino Pawlkom cun Veng tin ah feh in suthlamnak an nei ih mipi auaw cu a hnuai lam ah a sangsang ten kan tarlang a si.

Vankau veng
1. Covid ruangah a pum in kan khawng thei nawn lo. Bazaar lam in le kan sian zetin in lei ngam silo, tingaihnak thei lo ah kan sung ding hnak cun kan that ih a sa kan zuar mei.

2. Apum zuar hnakin a man kan ngah tam/ṭha deuh. Tulai, puai tivek a um thei lo ruangah avokpum cun zuar a har. Kan ngen zat le kan siang zat in le Bazar lam in, in lei sak ngam lo tikah that mei a ṭul si ko.

Balai tlunta veng
Sumpai khawlnak le Hawlnak hrangah ti`n harsa zetin vok kan zuat. Asinan a zuar lam ah kan duh vekin kan khawng thei nawn lo tikah kan that a si mei.

Dawrhlun veng
1. Kan duhzat in a Vok pum zuarnak ding a um lo ruangah that tengteng a ṭul thlang. Alakin le midang kan zem, kan ṭhen siang si lo, kan zuat peh thei nawn fawn lo, a rawl pek ding kan harsat ruangah kan that ih kan zuar si mei. Sumpai hawlnak le hmuhnak ding dang remcan a um lo ruangah that mei a ṭul.

2. Laimi pawl ih Vok kan zuat daan hi zoh men ding le a mawinak ih zuat a si lo. Innsang sumlutnak hrangah kan zuat cio mi a si. Sumlutnak ding hrang ahcun that lole a pum ih zuar ding a si. Tufang cu puai tivek le an tuah sianglo hlei ah sakhung lam in le a pum an nei nawn lo tikah that ding lawng a taang. Kan that lawngah vok kan zuat sannak “Innsang sumlutnak” kan nei thei ding.

Tlanglo veng
Kan that mei lo cun kan sung thluh, a rawl man thawn a kaih aw nawn lo. Kan ngan zat in le an lei ngam si lo tikah theih cingin Daan lengin kan that mei.

Lampa veng
Puai tivek a um lo tikah a pum in zuar a remcang nawn lo. Bazar lam ih an ngam zat in rawl pek cawm man thawn a kaih thei nawn lo tikah kan zuar siang lo. Curuangah Daan leng in kan that.

Cambary veng
Kan zuar rero nan a leitu pawl in Khuasung vok hnakin hmun dangta an lei deuh tikah leituding kan nei nawn lo ih kan that mei.

(Falam Mino Pawlkom)

Leave a Reply

Your email address will not be published. Required fields are marked *