Falam : Daan lo ih Inn sakmi pawl cu Ṭuanvonei Siipin lam in Hmalaknak an nei lai ding

Falam khuapi karh project hnui ih tawlrelmi Lungpi lamziin ceknak le tubaite innhmun thar peknak hmun ih Daan loin innsak/toh mi pawl cu tlunlam thusuak vekin Siipin lam in hmalaaknak nei an tum nan thuhla felfaiten relkhawmnak an nei hrih lo thu theih a si.

Tlunlam ih thupeknak vekin Siipin ṭuanvonei pawl cun November 20 ah Falam vengthar Lungpi ih Daan lo ih innsakmi pawl cu zohhliahnak an va nei.

Hih thuthawn pehpar in Siipin committee sungtel Pu Lian Thang cun, “Lungpi ṭha-nah zung kiang ih Siipin lamzin thar kan ceknak ah khan lamziin kap ah inn li lai an rak sak zo. Lamziin kan cek hnu ih sakmi an si. Cumi kha ṭuanvonei pawl thawn a hmun ah zohhliahnak kan nei ih tlunlam ah report thunlutnak kan nei lai. Ziangtin hmalaknak a um ding ticu kan thei hrih lo” tiah Chinland Herald daily news hnen ah a sim.

“Lamziin cektharnak ah Daan loin inn a rak saktu pawl cu tuhlan khal ah cuih lamziin an ceknak hmun ah hmunhma tivek rak nei cia lo mi pawl an siih khuapi karh project lamziin thar an cek hnu Kum 2019 hnu ah an sakmi a si.”

“Culawng siloin Lungrang tlang ih tidai gallon tingkhat tlem Siipin tidawl kiang khal ah Daan lo ih sakmi inn 5 lai a um. Cumi pawl cu kum 2017 hlan ih sakmi pawl an si.”

“Lungpi, Zalai, Laimual veng pawl hi Falam khuapi sungah a lut thlang ruangah inn sak ding tivek a si khal le Siipin zung ah siseh a pehparmi zung ṭuanvonei pawl hnen ah dilnak ca ṭhaten nei ding a siih dilnak neilo pawl cu Daan vekin cawhkuan tong ding an si.” ti`n Pu Lian Thang cun a sim.

Tubaite, Falam Tlanglo le Cinmual veng ih innhmun 247 phorh thar mi hmunram khalah Daan lo ih rak sak zomi Inn 13 lai a um ih cuih thuthawn pehpar in “cumi khal hmalaknak kan nei ding nan thuhla relfelnak a um hrih lo” ti`n Siipin ṭuanvonei Pu Lian Thang cun Chinland Herald daily news hnen ah a sim a si.

Leave a Reply

Your email address will not be published. Required fields are marked *