Falam Cozah Siizungpi ah Civil Disobedience movement nei thok tum

Zalennak ṭhiatbal in huumreek ukawknak lamziin zawhtu Myanmar ralkap cu rampihuap cozah Siizungpi tamsawn ih hnaṭuan Siibawi le nurse pawl in dodalnak an langter ih Falam cozah Siizungpi ih hnaṭuan Doctor le nurse ṭhenkhat khalin Ralkap cozahpi an dodal thu langternak caphek an suah a si.

Duhphorh langternak an suahmi ahcun ralkap in Myanmar ram thuneihnak a lakmi an dokalh thu an tarlang ih Ralkap cozah thusuahmi thlun loin “Civil Disobedience Campaign” timi daiziar cangvaihnak cu February 3 ihsin kan nei thok ding tiah an tarlang a si.

Hih thuthawn pehpar in Siizungpi ih ṭuanvonei pakhat cun “hnaṭuan kan cawl thluh ding tinak a si lo. Ralkap cozahpi kan duhlo timi langternak a si ih a hrang zawng ih cangvaihnak a si lo.”

“A olzawng in kan sim ahcun Cozah thupeknak thar tivek a um khalle kan thlun loding tithawn a bangaw. Siizung ih mina zohkhen dan cu a pangai in a feh thotho ding” a ti.

Sr. Gen Min Aung Hlaing hohami Myanmar ralkap cun 2020 rampi hrilawknak ih vote diklo puhmawh in February 1 ah rampi thuneihnak a laak a si.

Leave a Reply

Your email address will not be published. Required fields are marked *