Falam Central Nunphung Pawlkom in Falam Bazaar thar sak thei danding hmalaknak a nei

Falam Central Nunphung Pawlkom (FCNP) in Bazaar thar sak theinak hrangah ti thei tawk ṭan suah an tum tiah theih a si ih December 5 ah FCNP committee tonkhawm thurelnak khal ah cumi thu an rel tel tum tiah theih a si.

FCNP hotu Pu Suan Za Thang cun, “kan central nunphung innpi tla kan ṭhehsuak vivo ih kan pawlkompi kum 25 kim thawn ziangtin caan kan hmang ding, kan innpi kan rak ngah dan vekin Falam Bazaar thar ngah dan teh ngeihven a theih pei maw tivek pawl kan relkhawm tum deuh” a ti.

Falam Seninnpi sak theinak ding hrang India cozah hnen ih bomnak rak dil ngahtu Pu Run Bik thotho rinsan in Falam Bazaar thar hrang thurel tlangnak an nei tum a si.

Falam bazaar cu atu ah a hlun in a ropzet ruangah CDC Com.,Ltd ih ṭuanvo laknak thawn sak an rak tum lawk nan dawrkhaan neitu pawl ih sumsaw thoh ṭul dingmi a tam tuk ruangah remcang loin an rak hnukdawk sal dah a si.

Falam Bazaar thar sak tum mi thu ah Dr. Run Bik in “Nikum February thla ih Aung San Suh Kyi Falam a rat ṭum ah kan khaw nu khaw pa pawl in acozah in town hall le bazaar in sak sak aw tiin an rak dil. Suh Kyi cun acozah in harhdamnak lam,zirnak le lamziin tivek a tuah ṭulmi a tam tuk ih bazaar le town hall tivek cu nan mah ten raksak uh in ti” tiah Facebook cahmai ah a rak tarlang dah a si.

(ChinlandHerald daily news)

Leave a Reply

Your email address will not be published. Required fields are marked *