Falam CDM Committee in Pengpihuap Nu le Pa hnen ah thuthannak nei

SAC ralhraang tumtahmi theithiamlotu le Fale hmakhua hrang ruatin Tlawngap tumtu nu le pa ṭhenkhat an um ruangah hmailam hrang thu ṭhaten ruat dingin le thu ruat ding ṭhaṭha tarlang in Falam CDM Committee cun cathlahnak a nei.

Cumi ah Civil Disobedience Movement sullam, tuvek boruak ah fale Tlawngap cu ziang thawn a bang aw?, SAC ralhraang ih Tlawng ong nak san le Tlawng ong hnu thil thleng thei thuleng …. tvk tarlang a si ih Falam CDM Committee ih cathlahmi cu a hnuailam bangtuk an si.

Kan Fale Pawl Tlawng Ap Lonak Thawngin Kan Khua Kan Ram Hmin Siatnak Kan Humhim Pei

Ralhraang Ralkap RalLoKap pawl in dik lo zet in kan rampi cu an kut tangah an ret thu zo cio ih theih a si. Cuvete’n CDM (Civil Disobedience Movement) timi Mipi In Ram Uktu Pawl ih thu ngai lonak, atu dinhmun in cu Ralhrang pawl ih thu ngai lonak timi cangveihnak a rak suak.

A tlangpi thu in CDM timi cu cozah hnaṭuan pawl in an hnaṭuan nak ah feh loin Ralkap uknak duh lo lang ternak tuah tivek, Mipi lam khal in Ralkap ih thu pekmi pawl ziangsiar sak loin lamzawh duhphorhnak tuah tivek, cozah zung ah siah pek lo tivek a si.

Atu fang caan ahcu Tlawng ap ding le dinglo timi hi thubuai laar bik pakhat a si. Kan fale pawl tlawng kan ap le ‘Ralkap uknak kan duh’ ti thawn a bangaw ih kan ap lo sile ‘Ralkap uknak kan duh lo’ tinak a sibik. Curuangah kan fale pawl cu tlawng ap hrimrhim lo dingin Falam CDM Committee cun forhnak le ngennak kan nei duh a si.

Kan fale pawl tlawng kan ap ngah pang hlanah, silole kan ap ngah pang zo khal ah a tang ih thuhla pawl ruat ta ding khal kan lo sawm a si.

1. Dik lo zetin uknak lak in mipi kap that tu Ralkap kut tangah kan fale pawl tlawng kan toh ko ding maw?

2. Nauhak Upa ti lo kap that tu kut tangah kan fale pawl thinphannak um loin tlawng an kai thei ding na zum maw?

3. Kan fale pawl tlawng kan ap sile Ralkap uknak kan duh ti thawn a bangaw ruangah kan khua siseh, kan pengpi khal a hmin a sia cih theiih kan siang ding maw?

4. Atu boruak ah Ralkap pawl in kan khua ah siatsuahnak zianghman an tuah hrih lo pi tin thu letnak a um men thei nan Ralkap pawl cu thupeknak pakhat tang ah an um timi cu kan theih ciomi si ko lo maw?

5. Atu boruak ah Ralkap cun nauhak pawl tlawng a kai ter duh ngaingaimi si loin rampi cu a feh kel dan ten a feh ko ti thu an hmuh duh ruangah tlawng an phuan tummi a si hlei ah Falam peng ah CDM tu (tlawng phuan khal ah ca zirh lo dingtu Sya/Syama) 800 luan an um tikah kan fale pawl hi tlawng ah ca ṭhaten an zir thei ding na zum maw?

Kan fapa/fanu tlawng kan ap lo ruangah Falam peng a hmin sia lo ding na ti men thei. Asinan cu tivek in pakhat tete kan ap vivo le tlawngap mipum an tam dingih kan innsang ihsin kan pengpi tiang a hmin a sia cih thei. Cu hleiah mihrek cun Ralkap in a hmin men in tlawng a ong dingih COVID-19 boruak ruangah tiin a rei hlan ah tlawng an phit cih ding tin an sim.

Kan fale pawl tlawng ap lonak thawng in kan innsang, kan khua, kan pengpi, kan ram hmin siatnak in kan humhim cio pei.

Leave a Reply

Your email address will not be published. Required fields are marked *