Falam, Bualrawn Tlawng in Tohkham, Cabuai Ṭulsam

Falam, Bualrawn tlawng ah tlawngta pawl ih hman mi tohkham, Cabuai le Covid – 19 donakding hmanrua an ṭulsam thu theih a si.

Tlawnginn ih hman ding ṭulsam mi thu thawn pehpar in Bualrawn tlawng Sayakyi Pu Phun Khup cun, “Kum 2015, Komen thlisia hrang ṭum ah baulrawn tlawng kiang ah lei a min ih, cuih ṭum ihsin bualrawn tlawng cu Lailak tlawng dingah a tlak nawnlo tiin Matubuk tlawng thawn kan thlengaw ruangah bualrawn tlawng cu Hramthok tlawng ah a cang a si.

Cutiih tlawng ṭhawnawk ruangah bualrawn tlawng thilri pawl cu Matubuk lam ah an ṭhawn ih Matubuk tlawng thiri cu bualrawn tlawng ah kan ṭhawn ve.

Cule, Matubuk tlawngta le hitawk bualrawn tlawng ih tlawngta umzet cu an bangaw nawnlo. Matubuk ahcun tlawngta 30-40 hrawng an siih bualrawn tlawng ahcun tlawngta mipum 150 hrawng kan um. Cutiih tlawngta kan tam ruangah tohkham, cabuai tivek kan deihaw nawnlo.

Kan dung kum khalah tohkham, cabuai kan neih sun 60 hrawng ahcun tlawngta 150 luan kan benaw terih khung khat ah minung 3-4 to tlang ṭul a si.

Cun, a tu August thla hrawngah tlawng ong ding zum a um ih tlawng kan kai thei a si le social distancing daan thlun a ṭul bet ding tikah tohkham le cabuai kan deih awlo sinsin” tiin a sim.

Bualrawn tlawng cu tuhnu kum rei lo ah Lailak tlawng dinhum ngah thei saal beisei a si ih computer le Xerox copy tuahnak tivekpawl khal kan ṭul a si ti khal in a sim bet.

Hitiih harsatnak an tong mi cu Bualrawn tlawng rak kai dah pawl in bawm tum in online ah fund hawlnak an nei.

Online ihsin fund hawlnak cu July 1 ihsin an thok ih US$ 3000 ngah ding tumtahmi ah US$ 480 an ngah zo a si.

Falam, Bualrawn Tlawng ṭhangso vivo thei dingin bawmnak na pe duh le hinah hmet Bualrawn Tlawng hrang Fund hawlnak

Leave a Reply

Your email address will not be published. Required fields are marked *

error: hahahahahaha !!