Falam boruak a Sosang, Meithal le Mitthli tlak Bomb an kap

Ralkap uknak dodal in February 28 ih duhphorhnak neitu Falam mipi cu palik in warning khal pe ṭhiṭha loin mitthil tlak bomb thawn an kap hlei ah mipathum an kai tiah theih a si.

“Duhphorhnak kan nei rero lai ah ziinpi kaphnih in palik pawl nih in kulh thluh. Nan tlung lole kan lo kap ding an ti ruangah Gospel biakinn lam ah kan suk.”

“Cunah khalah in ra thlun thotho ih, Palik pawl cun mipi ṭhekdarh dingin minute 3 caan kan lo pe an ti ve leh warning dang um lo in mitthli tlak bomb an kap cih” tiah duhphorhnak ih telvetu mino pakhat in a sim ih “tutiang, ka mit na khal a reh thei hrih lo” a ti.

Duhphorhnak ih teltu miṭhenkhat cun mitthil tlak bomb an puah fangah palik in meithal khal an kap. A awn kan thei thluh tiah an sim.

Mitthil tlak bomb ruangih talbuai rero mipi lakin palik in mipathum an kai ih, kaihkhihtuar mipathum cu zamrang thei tawk in vankau ralkap umnak hmun ah an kuat tiah thuthang kan dong a si.

Kaihkhih tuartu mipathum thuthawn pehpar in Salai Thian Uk Thang cun “an kai mi cu Kyaw Kyaw, Bawi Than Cuang le Pa Van pawl an si. Pastor pawl thawn ṭuanvo nei pawl kan biak lai ah palik zung ihsin ralkap umnak vankau ah an kuat”.

Ralkap ṭuanvo neitu kan biak ih a ṭhabikin zohkhen dingin le kutthlak sak lo dingin kan sim. Annih khal in mah le mah kan siih a neembik in an tawlrel ding thu in sim. An luat cih thei dingin kan zuam rero lai” tiah Facebook cahmai ah a tarlang.

Leave a Reply

Your email address will not be published. Required fields are marked *