Falam Baptist FBC zungpi kan sak thlang ding – Dr. Run Bik

Falam khua ih Biakinn tum bik FBC zungpi cu sawng 3 siin kum 35 lai a hlun zo. Hman hrih cu a theih ko nan san a man nawn lo ih tlunah sawng 4 ih sak that ding a si ih member pawl ih lungkim thluh a si ko.

Mizoram, Aizawl Canmari ah ka thlen kum 1976 ih Presbyterian Biakinn sawng 2 an sakmi cu kum 25 hnu ah san man sawn le ṭha sawn si, sawng 4 in an run sak ṭha.

Tuisun 22/11/2020 mithi hmun ah FBC pastor Rev. Dr. Phun Hram Awi thawn kan tongaw ih, cunah ziang tikah biakinn zung kan sak ding ti`n ka sut ih hnakum February cun kan thok ko ding a ti. Tu ah Ks ting 1000 kan nei zo ih kan thawh lawlaw cun member pawl in sum an thawh ciamco ko ding a ti.

Kei, tui kum tir ah Pathian hnen le mi theih ah ka thlatin thawhhlawm ka regular in come ih zaṭek 11 ka thawh ding ka ti. Pathian bomnak in ka tlin ko. Ka thla tin thawhhlawm ih tlun ah tui zung building hrangah ka theih tawk ka thawh bet ding.

Tahan ih Zuatit Hmunṭha Baptist kawhhran inn 220 le member 1000 lai nei in paisa ks ting 200 in kumkhat le hrek sungah ks ting 4000 man biakinn thar an sak thei.

Kan nih FBC sungkua 650 lai le member 2700 nei in ziangah saw hi zung kan sak ngam mai lo ding. Kumkhat sungah ṭheh kan tum ding. Falam townhall le nunphung inn tla kumkhat lawng si an rei. Himi hnu ah church planting zamrang zet in kan tuah ding.

Dr. Run Bik

Leave a Reply

Your email address will not be published. Required fields are marked *