Falam ah Ralkap Ukhruainak hnuai ih hnaṭuan lutsaltu an tam

Ralkap ukhruainak hnukthlak dingih hmanfung ṭhabik pakhat a simi CDM cangvaihnak cu rampi huap cozah hnaṭuan tamzetin mah pumcawmnak hnaṭuan thaap rori`n an tel ih Falam khuapi khalah CDM ih teltu cozah hnaṭuan an tamzet.

Nan, March thlalai hrawng ah CDM cangvaihnak bansan in ralkap ukhruainak tang ih hnaṭuan sal an tam tiah thuthang kan dong.

Tuhrih tiangih thuthang kan dong vek a si le CDM bansantu ah Siizung hnaṭuan le Tlawng saya/mah an tam tiah theih a si.

CDM bansantu pawl i thuthawn pehpar in Falam mino pakhat cun “beidongza rori a si ih zahthlah zet khal a si. Nunnak tiang thaap in Dothlennak ih nunnak liamtu mino an um lai ah inhrem, inthat rerotu ralkap ukhruainak hnaui ih hnaṭuan lutsaltu Falam peng ah an tam.”

“Abikin siizung lam ih hnaṭuan le Tlawng saya/mah an tam. CDM bansantu Siizung hnaṭuan mipum 20 an luan ih Tlawng saya/mah khal mipum 20 kiangkap an si.”

“Tlawng saya/mah pawl cu an sinak khaisoding ti a si ruangah ralkap pawl ih thleemnak hnuai ah an lut mei. Cukhalcu Tlawnginn uniform khal hruh ngam loin pangai thuamhnaw hruk in a thu thiar in an cangvai mi a si. Hipawlhi online lam khalah kan pholang zo ih CDM bansan in ralkap ukhruainak hnuai ih hnaṭuan lutsaltu dang an um khalle zo pawl an si timi kan pholang hrih bet ding” a ti.

Leitlun san thuanthu kan zoh a si le CDM cangvaihnak hin hriamhrei rinsan ih hngalpuar ralkap ukhruainak neh a theih timi kan hmu thei ruangah kan ram khalah ralkap ukhruainak hlonhlo dingih hmanfung ṭhabik pakhat a si mi Civil Disobedience Movement hi bansan loin tumtahnak tumpi thawn ṭanla hrih cio uh si.

Leave a Reply

Your email address will not be published. Required fields are marked *