Falam ah ralhraang ralkap pawl mah le mah kapaw that

Mizaan, July 15 khaw thim hnu ih Falam khawsung meithal puak awn a suak ciamco mi cu ralhraang ralkap pawl mah le mah an kapaw mi a si ih hmun dangdang khalin um zia nei lo in meithal an kap ciam co tiah theih a si.

Zalen thuthang tarlangdan ah khawsung vehvaitu ralhraang ralkap pawl hmunram an hal lai ah, Tlanglo veng, PCM biakinn hmai ih mipakhat feh men cu meithal thawn an kap ih mah le mah kapaw ngah in ralhraang ralkap pakhat a thi ti a si.

Khawmi pakhat khal meithal hriam tuar in Falam siizungpi ah kuat cih a si ih tuamhlawm in a um cih tiah Zalen thuthang cun a tarlang.

Tlanglo veng ihsin meithal puak thawm a suak veten Vankau le palikzung lam in um zia nei lo in meithal an hmetpuak nasa ih khawmi pawl an thinphang thluh.

Meithal puak thawm a suak hnu ah, internet cahmai ah khawmi pakhat a thi ti`n thuthang a leng nan, cuih thu cu thuthang diklo a si ti`n biaknaklam hruaitu mipakhat cun a sim fiang zo.

Mizaan, July 15 ih Falam khawsung thil cang thawn pehparin tualsungum upa kan pehtliah nan letnak kan dong lo.

Siarbet : Falam-Kalay karlak Lamzin a min nan Falam mipi hrang, ei-in lam phan ding a um lo

Falam-Kalay zinpi, Taingen le Suahliim karlak Lamzinpi a min ih, mawṭaw feh thei lo ding khawpin a min sia ruangah Khawmi ei-in ding phurtu mawṭaw pawl feh thei loin Falam khuasung ah Fang,Siiti le ei-in dangdang a har pang ding an phang zet.

Culai ah Falam-Kalay karlak thilphur mawṭaw service tu ChinCherry cun don har in um lo dingin le thla 2 deih Fang/Siiti/Cii tipawl ret ṭhat cia mi a um thu, a tarlang.

Paisa tamzet cemliam in Furpi hrang ei-in thilri an khawl cia mi a si ih, cu pawl cun amalbik thla 2 tal a deih ding tiah ruah a si.

ChinCherry cun “Kan dung, Lamzin an phit ṭum ah thin har in kan rak um zo. Atuah zin a min ruangah don har in kan um cio ding zum a um.”

“Nan, tuvek dinhmun a thleng thei ti`n kan ruat cia ruangah paisa tamzet cemliam in Furpi hrang thilri kan khawl cia. Cumicu amalbik thla 2 deih hrawng a si. Thilphur mawṭaw mawng pawl in Chinmi hrangah ti`n remcang dingin an zuam ve rero.”

“July 15 zaan khalah thilphur mawṭawtum 2 thleng mi a um. Zohman thin har in um hlah uh si. Thil phur mawṭaw mawngtu hrangah thlacam sawn uh si” tiah a tarlang.

Falam peng Zin min nak hi Taingen-Suahliim karlak, pengban 32-33 ah a si ih, July 14 ah ruah a sur tamtuk ruangah a min mi a si.

Leave a Reply

Your email address will not be published. Required fields are marked *