Falam ah Inn hmun thar 1000 luan phorhsuak sal tum

Voihnihnak Falam khuapi karh project innhmun phorhsuak ding cu February thla sung ah ṭan thok thlang ding a si thu Chinram Siipin bawi U Soe Htet in a sim.

“Falam ah innhmun thar phorhsuak ding thawngkhat hrawng a um. Asinan, voikhatnak Falam khuapi karh project innhmun phorhsuak mi ah ṭheh felfai hrih lo mi a um. Thingram zung lam ih akhuun pek felfai hrih lomi khal a um.”

“Cun, hmunram neitu lam ih rem tilo ruangih ṭheh felfai hrih lo mi a um ih Lungpi veng ta khal kan ṭhehsuak hrih lo. Ṭheh felfai mi khal a um ih a tanglai mi khal kan tawlrel pehzom rero.”

“February thla ah innhmun phorhsuakding 1000 luan a um. Central cozah lam ih siannak ngah ṭul mi tete a um lai. Cumi kan ngah veten kan ṭuan thok cih ding. Atui` cozah hnuai ah kan tuahsuak thluh ding” tiah Chinram Siipin bawi U Soe Htet in a sim.

A ninii in khuate ihsin Khuapi ih ceer tu an tam vivo. Falam peng ih mipum 50000 luan um mi ah Khuapi ih um zaṭek 33 hrawng an si ih Khuate ah zaṭek 67 hrawng lawng an tang thlang. Falam khuapi a ṭhangso vivo ruangah khuate tansan in Khaupi ih kaiso an tam tikhalin U Soe Htet cun a sim hrih a si.

Falam khuapi karh project ih hmasabik innhmun phorhsuahmi ting 20, ting 10, ting 5 man Inn-hmun 245 pawl cu kum 2020, November 2 ah Siipin le Cozah ṭuanvonei hohanak in camcawhfung zuuknak thawn mipi hnen ah an zem suak zo a si.

Hram : The Hakha Post

Leave a Reply

Your email address will not be published. Required fields are marked *

error: hahahahahaha !!