FALAM ah Government Technological Institute (GTI) tlawnginn an sak ding

Falam, Zalai veng ah Government Technological Institute (GTI) tlawng pakhat sak a si thlang dingih July 13 ni ah ṭuanvo neitu pawl in hmunhma haalnak khal an nei zo thu theih a si.

Hih phungsang tlawnginn cu 2020-2021 budget ah cazirnak innpi 162` x 38` dot hnih inn pakhat sak ding le hruang kulhnak pi 4000 sau hnaṭuan pawl thawn thok thlang dingmi a si.

Tuhlan ahcun GTH timi phun 8 ong pawl ih kaai theimi tlawng rak sak dingin tumtah a si na`n cumi tlawng cu Thantlang ah sak a si ruangah atu ahcun phun 10 ong pawl ih kaai dingmi GTI tlawng dinhmun in sak thokmi a si tiah Hakha GTI tlawng Sayakyi Dr Tluang Za Thang in a sim.

Amah cun, “Tuhlan ih GTC tlawng pawl cu GTI tiin an ṭhawn thluh ih Falam ih sak dingmi cu Hakha ih GTI tlawng thawn a dinhmun a bangrepmi a si. Rampi ih timlamnak ah Falam ih GTI tlawng sak ding a tel lo na`n ṭuanvo neitu pawl ih zuamnak ruangah project thok cih a siih ziangtik ah phun thok thei ding ti cu a fiang hrih lo. Asinan thok zo a si tikah a um thlang ding ti cu a fiangmi a si” tiah Chin Herald Daily News hnen ah a sim.

Khawlak ih relnak ahcun rampi VP2 Pu Henry Van Ṭhio in Zalai ih ret tummi GTH tlawng cu Thantlang ah a ṭhawn ruangah a aiawh ah atui` GTI tlawng an pak saalmi a si ti`n an rel.

Falam vuanthok bawi AD Pu Ca Awi cun, “himi kan ngahnak hi February lam in ca a suak zo na`n tuah ṭulmi pawl a taang hrih ruangah mipi hnen kan than hrih lomi a si.Atu ahcun tlawnginn saknak hrang hmunhma zohnak khal kan nei zo ruangah kan tefa pawl umhmun ihsin GTI tlawng an kaai thei thlang ding” tiah a sim.

GTI tlawng cu kum 3 sung kaai ding ding a siih an ṭheh tikah AGTI Diploma caken pek dingmi tlawng a si. Atufang Hakha GTI tlawng ah tlawngta 585 an um ih Falam GTI tlawng an ṭheh ahcun tlawngta pawl an ṭhen aw saal leh ding tiah ṭuanvoneitu pakhat in a sim.

Rampi cozah ih fehpimi ah Technological Vocation Education Training (TVET) timi tha a pezet laifang a si ruangah Falam ah GTI tlawng saknak dingin budget an thlaakmi a si thei tiah Dr Tluang Za Thang cun a sim.

Amah cun,”tukum ah phun hnih hrang budget a tlaak ih hmai kum ah budget tampi a tlaak bet thei a si le 2022 kum cem ahcun ca zir thok thei a si ko ding” tiah a sim. Amah cun Engineer tlawng a kaaitu Chin miphun tlawngta pawl in tlawng ṭheh hnu ah engineer ṭuan ding lawng ruat loin GTI tlawng pawl ah zirhtu ṭuan duhmi an tam ding a thupi thu khal a sim a si.

CH daily news
zuk : Pu Ca Awi

Leave a Reply

Your email address will not be published. Required fields are marked *