Falam ah Diklonak thawn Neinung mi Mi Puarthau kan tam – Opinion

Falam khuapi hi kan ṭhangso vivo in ka hmu ih, cumi pawl ah Tidai sunzaan hman ding kan nei thei thlang, Khuasung lamziin khal a ṭha vivo ih Ciarbeek le Leivut tivek khal hmuh ding a um lem nawn lo. Meisa khal sunzaan kan ngah, Zanthing lei le phurh a ṭul nawnlo. Vanzam tualrawn le kan nei thei thlang. Siizung lam khalah Siibawi kan nei kim vivo.

Khuapi pakhat ih ṭul zetmi Senpi runinn le nunphung inn siseh, Vuanthok innpi ṭha zet khal kan nei thei thlang. Bulpak inn ṭha zetzet khal hmuh ding a um vivo thlang. Cule mipi khal ei le in lamah kan hnianghnar vivo, Sin-fen lam khal ah kan cangkang vivo thlang.

Asinan a poi tukmi cu hi vekih kan ṭhanso vivo thei hi in thlawsuahtu kan Pathian hnenah lungawi thiamtu si lam hnakin Mi hngal, Mi puar thau, Mi ziangsiarlo, thiambik ih ruataw, Lianbik ih ruataw tvk kan um tam vivo hi a ṭha lo zetmi a si.

Milian le mi thupi zet vekih ruataw ṭhenkhat pawl tla cu an sumpai laklut daan hi fih a nung zet. Ziangah tile eiruuknak in an ngah. Cozah sumpai firnak in an ngah. Cozah duh lomi sumdawnnak in an ngah. Asinan an mah cu dikzet ih sumpai ngah vekin an nung an um. Hi ruangah kan Falam khuapi kan ralring a ṭul zet thlang lo maw?

Pathian in kan thil tuahmi ziangkim in hmu thluh, in zoh ringring fawn. Hi ruangah Pathian mi Pastor pawl khal in mai member lakih diklonak thawn sum lalut tivek cu hmaisong lo ten sim aw ngam sehla a va ṭha ding ve.

Tulai kan boruak hi a ṭha lo ruangah khawm khal kan khawm thei lo, Pastor pawl ih thusim mi khal kan ngai thei tuk nawn lo, a poi tuk ka ti. Cang thei sehla Falam khaw sungih um Pastor pawl hmuahhmuah in mai inn (Biakinn) men lawng siloin hmun khat te ah kom khawm in kan Mipi, kan Cozah (hruaitu) hnaṭuantu, NGO hnaṭuantu le Company hnaṭuan pawl hrangah thla in cam sak thei ṭheu sehla kan ṭhanso daan khal a dik vivo pei maw tiah ka ruat.

Duhsaknak tumpi thawn
William Cinmual Pa
via
Falam Mino Pawlkom zarhtin Cazual

Leave a Reply

Your email address will not be published. Required fields are marked *