Falam ah Covid nat nak in mipakhat thi sal (June 29)

June 29, zaanlam nazi 5 hrawngah kum 51 mi Daw Win Mya Kyi in Falam siizungpi ah Covid natnak thawn in cemsan ih Volunteer pawl in Laampa thlanmual ah a zaanzaan in an vuiliam cih tiah theih a si.

Amah hi Kawl miphun a si nan Recycle business (​ရောင်းတယ်/၀ယ်တယ်) tuahin Falam ah kum 20 luan a rak um zo. Kan dung baite ah a fapa in a thihsan zo ih atuah a pasal U Tun Ngwe le a fanu hawi ruanlo tanta in mual in liam san a si.

June 29 (tuni) ah Falam Siizungpi OPD ih COVID-19 Nat Zohfelnak ah mi 25 sungah mi 13 in Nat an nei ti’n an hmu a si.

May 20, 2021 ihsin June 29, 2021 tiang Falam siizungpi ih Nat zohfelnak ah mi 247 an positive ih mithi 12 an um zo a si.

COVID-19 ruangih Falam peng sungah a thimi pawl cu: June 2 ah Pi Zing Rem Thluai (Kum 53), June 12 ah Rev. Piang Bik (Ramthlo- Kum 51), Pi Khawfeli (Rihkhawdar- Kum 81),
June 13 ah Pu Sui Ceu (Kum 67) le Pu Lalthanpuia (Rihkhawdar- kum 38), June 16 ah Mai Lal Muan Kim (Kum 27), June 18 ah Pi Za Nawn Kai (Kum 79), June 19 ah Pastor Thang Hre Mang (kum 33), June 21 ah Pi Lun Khaw Niang (kum 76), June 22 ah Salai Lal Than Eng (kum 25), June 24 ah Pu Cung Lian (kum 66), June 25 ah Pu John Ral Za Lian Kulh (kum 60), June 26 ah U Win Naing (Rihkhawdar- kum 72), June 27 ah Pu Hrang Thawm Vel (kum 62), June 28 ah Pu Leeng Tin Hre (kum 66), June 29 ah Daw Win Mya Kyi (kum 51) pawl an siih Falam khuasung ihsin mi 12, khuate ah mi 4 ti`n Falam penghuap ah Covid ruangih mithi 16 an um thlang a si. (CH)

Leave a Reply

Your email address will not be published. Required fields are marked *