Falam ah Covid mina pakhat in in cem san leh

Tulai Falam Covid boruak cu deem lam pan loin nat nei thar an um ringring ih nitinten mina thar 10 luan deuh thaw an hmusuak ṭheu.

Tuni June 30 khalah Falam Siizungpi ih nat cekmi 35 sungah mi 16 in nat an nei mi an hmusuak a si.

May thlacem lam ih Covid mina an hmu thok sal hnu, caan tawite ah nasa tukin Covid 19 nat a karh ih thla 1 luan fangah penghuap in Covid ruangah mithi 17 an um zo.

June 2 ah Covid-19 mithi kan nei hmaisabik ih a khaatkhaat in mithi an um bet hnu, June 18 ihsin Falam khuasung ah nitin deuh thaw in mithi an um ih, June 30 khalah Lungpi vengih Pi Ni siang Men (kum 39) in Covid natnak thawn Siizung ah in cem san tiah theih a si.

Zaanlam nazi 6:00 hrawng ah in cem san ih nazi 8 ah Volunteer pawl in Lungpi thlanmual ah an vuiliam cih.

Atufang Falam Covid mina dinhmun

May 20 ihsin June 30 (ni 41) tiangah mipum 768 hnen ah nat zohfelnak an nei ih, cumi ah 262 positive an um. Covid 19 positive lakin Falam khuasung ah mithi 13 an um zo.

COVID-19 ruangah Falam peng ihsin in cem san zotu pawl cu:
June 2 ah Pi Zing Rem Thluai (Kum 53), June 12 ah Rev. Piang Bik (Ramthlo- Kum 51), Pi Khawfeli (Rihkhawdar- Kum 81),
June 13 ah Pu Sui Ceu (Kum 67) le Pu Lalthanpuia (Rihkhawdar- kum 38), June 16 ah Mai Lal Muan Kim (Kum 27), June 18 ah Pi Za Nawn Kai (Kum 79), June 19 ah Pastor Thang Hre Mang (kum 33), June 21 ah Pi Lun Khaw Niang (kum 76), June 22 ah Salai Lal Than Eng (kum 25), June 24 ah Pu Cung Lian (kum 66), June 25 ah Pu John Ral Za Lian Kulh (kum 60), June 26 ah U Win Naing (Rihkhawdar- kum 72), June 27 ah Pu Hrang Thawm Vel (kum 62), June 28 ah Pu Leeng Tin Hre (kum 66), June 29 ah Daw Win Mya Kyi (kum 51), June 30 ah Pi Ni Siang Men (kum 39) pawl an siih Falam khuasung ihsin mi 13, Laikhua lam ihsin mi 4 an thi zo ih zatekom mithi 17 an um thlang a si.

Leave a Reply

Your email address will not be published. Required fields are marked *