Falam ah Covid 19 thawn pehpar in Daan thar an tuah

July 6 ihsin thok, Falam ih Covid 19 mina pohpoh cu inn lam ah Home Quarantine in ret a ngah nawn lo tiah Falam FM in a phuang.

Covid mina besia deuh pawl cu Siizung lam ah siseh, nat pianhmang lang tuk lo, mi damcak deuh pawl cu kutthiam tlawng (eain dwin hmuh), Siizung quarters thar le Laikhua lam țhansonak zung (DRD) godown pawl ah Quaratine dinhmun in zohkhen an si thlang ding tiah an phuang.

Falam khuasung ah 2021, May 20 in Covid mina an hmu thok sal ih, July 5 tiangah mipum 977 nat an check ih Covid nat nei mipum 359 an hmu zo a si.

Caan tawite sungah nat a karh cak rualrual in Siizungpi ih zohkhenmi Covid mina damsalzo mipum 130 an um zo tiah theih a si ih tudinhmun ah Siizung ih tuamhlawm reromi Covid mina 89 an um lai a si.

Covid mina an hmu sal hnu zarhhnih nakah Covid ruangih thi an um thok ih July 5 tiangah Falam khuasung ihsin mithi 17, Laikhua lam ihsin mithi 4 an um zo ih zatekom mithi 21 an um thlang a si.

COVID-19 ruangih Falam penghuap mithi pawl cu — June 2 ah Pi Zing Rem Thluai (Kum 53), June 12 ah Rev. Piang Bik (Ramthlo- Kum 51) le Pi Khawfeli (Rihkhawdar- Kum 81), June 13 ah Pu Sui Ceu (Kum 67) le Pu Lalthanpuia (Rihkhawdar- kum 38), June 16 ah Mai Lal Muan Kim (Kum 27), June 18 ah Pi Za Nawn Kai (Kum 79), June 19 ah Pastor Thang Hre Mang (kum 33), June 21 ah Pi Lun Khaw Niang (kum 76), June 22 ah Salai Lal Than Eng (kum 25), June 24 ah Pu Cung Lian (kum 66), June 25 ah Pu John Ral Za Lian Kulh (kum 60), June 26 ah U Win Naing (Rihkhawdar- kum 72), June 27 ah Pu Hrang Thawm Vel (kum 62), June 28 ah Pu Leeng Tin Hre (kum 66), June 29 ah Daw Win Mya Kyi (kum 51), June 30 ah Pi Ni Siang Men (kum 39), July 1 ah Pi San Del (kum 63) le Pu Lal Duh Cung (kum 44),July 2 ah Pu Hung Hleih (kum 46), July 5 ah Pu Thang Lam Kim (kum 40) pawl an si.

Siarbet : COVID 19 third wave Falam

OXYGEN HAWP RERO HMANSEHLA….. by: Dr. Steven Cung Sin Thawng Luai

Thli kan hawp mi sung ih tel mi Oxygen hi kan cuap sung a thlen in cuap ih um ဘောလုံး vek thlibawm (Alveoli) pawl ih နံရံပါး a pahtlang ih cu mi thlibawm ih thihri fatete (Capillaries) ihsin thisen sung ah a lut. Cuti cun thisen sung ihsin kan taksa hmun tin ah a thleng.

COVID nat ngah pawl hi nat ngah hnu ni 5 le ni 12 karlak hrawng ah nat a puang ttheu ih nat ngah tu ih 20% hrawng hi an besia ttheu. Hi mi COVID nat hrik hin cuap hi a dodal cuang ih thlibawm pawl cu an thling, tii a suak ih nehhnu ah cun Oxygen a zuuk thei nawn lo. Cu tik ah minaa cu khuh le taksa men si lo in thawsam le thawkhop lo in an um.

Cui tlun ah hih nathrik hin nat do tu thisen (lymphocytes) khal a kaang ter ih a that cih fawn. Cutik ah nathrik dang dang(Bacteria) pawl khal an ra lut cih sin sin. Cu lawng sihrih lo in COVID nat an besiat vivo cun thii a khal ih thihri fatete ihsin a tumdeuh tiang a phit hrih. Cutik ah cun a leng ihsin Oxygen nasa tak ih pek rero khal le cuap sung ah a lut thei lo ih thisen sung ah a thleng thei nawn lo. Hi mi thikhal (bloodclots) pawl hin thluak le lung lam thihri pawl a phih bet a si ahcun zamrang zet ih thih a ol te.

Curuangah kum upa nauta le natnei cia le cia lo ti um lo in an thi ttheu. COVID nathrik ih cuap a siatsuah (Fibrosis) mi tam le mal ih zir in Oxygen sam daan khal an bangaw lo. Minaa hrekkhat cu an besiat nak in an damcak sal deuh hman ah an cuap a siat mi a tam deuh a si le rei deuh(thla khat zik) tiang Oxygen pek an ttul ttheu.
Curuangah COVID nat in cuap a siatsuah tam man hlan ah dam lo le mah ten zumhmang in sii ei lo in thawthawt a nuam lo deuh veten piah aw lohli hi a thupi zet. Kutzim Oxygen tah nak (Pulse Oximeter) nei pawl khal thisen sung Oxygen tam le mal a tu le tu tah ring ring a ttha.
Ps. SpO2 < 92% a si ah cun zamrang ten sizung lam pan a ttul.

Leave a Reply

Your email address will not be published. Required fields are marked *