Falam ah Covid 19 thawn pehpar in Daan thar an suah

Falam Covid boruak thawn pehpar in theitawk suah ih ṭuanvo la rerotu Volunteer le Falam Covid ṭuanvonei pawl cun Covid mithi vui thu thawn pehpar in daan thar an suah ih mipi lam khalin cuih daan cu thlun tengteng dingin sawmthannak an nei cih.

Cumicu Covid mithu vui tikah Volunteer mipum 6, Pastor 1 le siattongtu sungkhat 3 ti`n mipum 10 lawng tel thlang ding, Volunteer pawl ih mawțaw ah minaa le midang pawl to lo ding tipawl a si ih, Volunteer ṭuanvonei mipakhat cun “Covid mithi ruak vuinak ah mipum tam ih thlahmi cun Nat karhzai ternak a si thei ruangah atu kan dinhmun ah kan ralrin țul tukmi a si. Curuangah COVID-19 ruangih a thimi ruak kan vui tikah Volunteer mipum 6, Pastor 1 le sungkhat 3 tiin mipum 10 hnak ih tam lo thawn lawng, vui thlang dingah Falam COVID țuanvo nei pawl in an relcat zo. Kan thlun tengteng cio pei.”

“Volunteer pawl ih mawțaw ah minaa le midang pawl kan phur lo. Ziangahtile nunnak thaap in pum a petu Volunteer pawl hi nat ngah olbik nak sungah an um ruangah a cang thei bikin Nathrik kaai lo dingin kilhim aw rero a si. Volunteer pawl ih mawțaw ah nathrik a taang pang lonak ding hrangah minaa phur tivek, thlaan fehnak ah mithi innsang pawl phur tivek tuah lo dingin kan hrial hrim. Curuangah phundang ih hmusual lo ding le Volunteer mawțaw thawn minaa phurh sak dingih dil tivek tuah hram lo dingah theih ter phah in sawmnak kan nei a si” tiah CRCDF FB cahmai ah sawmthannak ca a tarlang a si.

Tu dinhmun ah Falam ih Covid 19 mina 433 an um zo mi ah Siizung suak 213 le mithi 35 an um zo tiah theih a si.

Leave a Reply

Your email address will not be published. Required fields are marked *