Caamkhat sung Mina kil dinhmun in Falam Siizungpi ih ka hmuh ton mi

Ward – B

Ka pu khal Covid 19 nat a ngah ve ih, inn lam ah ni tawkfang kilkhawiawk in a um. Damlam a pan thei lo, a Oxygen(SPO2) a tla niam deuh ruangah Falam siizungpi ah tuamhlawm ṭul dinhmun a si thlang. July 3, sunhnu lam in siizung ah kan fehpi ih Siibawi pawl in inzoh sak hnu, Ward-B ah an ret.

Falam siizungpi hi, innthar an sak hnu, a hlan ih Ward – A,B,C, OT(Khuai-khan) pawl hi Covid mina zohkhennak ah an hmang thluh. Covid boruak thok lam ihsin an rak timtuahcia mi a si tikah mah le Ward cio ah zun/pawng tlannak khal a rak remcaang thluh. (OT hi, remcang lonak ruangah a hmaisa ah mina pakhat lawng ret theih a si nan, nehhnu ah mina pathum ret thei dingin an tuah saal)

Cuih mina kilkhawinak Ward pawl lakah Ward-B hi mina besia deuh le besia lo khal le Oxygen hawp ṭul deuh pawl retnak ah an hmang. Ziangruangah tile cutawk Ward- B ah Sayama pawl duty an kai. Cun, Oxygen pekawknak khal ah a remcaangbik ruangah a si.

Ward-B khaan sung ih a hmaisabik hmuhton mi

Kapu khal cu Ward-B ih ret ṭul dinhmun besia lam a si ruangah le Oxygen hawp ṭul a si ruangah Ward-B ah an retnak a siih, July 3-4 nihnih sung hi Kanu Ṭial (ka nu uu) in a mah lawng in a rak fingkhawi. Kanu Tial hi kum 60 luan zo a si, kapu hi mi pakhat lawng ih kilthei dinhmun a si lo ruangah July 5 ni ah siibawi pawl siannak thawn Kapu kilbawm dingin Ward-B sungah ka lut ve.

Ward-B ah minakhaan kaan-ṭhen 6 a um, Saklam ah khaan 3, thlanglam ah khaan 3. Khaankhat ah it-khun 4 an ret thluh. Ka hei lut tikah cuih khaan ṭhen 6 sungih it-khun pawl ahcun mina an khat ṭheh. It-khun lawngmi hi pahnih/thum hleilo a um lo ding. Kan nih kan khaan khal ah kapu thawn mina 4 an rak um ve. Pee 18 kiimvel kimlomi khaan sungah minakiltu thawn mipum 8 an rak um cia. Keimah ka hei bet ih mipum 9 kan um. Mina thawn, kan hnipuan fuun le kan puantom, kan ei-in ding pawl thawn, ruatnak men ahcun kan tlem lo ding a bang nan, kan rak tlem ko.

Kapu cu Oxygen a rak hawp rero. Kan khaan sung minaa dang pawl khal an rak hawp ṭheh. An it-khun kiangah Oxygen dur tum pipi thawn an rak si thluh. Ka hei thlir thluh tikah kan khaan lawng silo minaa kiltu siar lo an zaten Oxygen an rak hawp thluh. A damdeuh pawl in Hnar bun thawn, malte tamdeuh hawp ṭul pawl in Hmur le Hnar khuh mi thawn, a besia deuh pawl cun Hmur le Hnar hup mi ah a tang lamah Plastic bag a tel bet mi thawn (Reserver Bag antimi oxygen hawpnak), hrekkhat cu Hnar bun le Reserver Bag thawn kop in oxygen an pek awk. Hitivek ih Oxygen hawp vialvial thluh minaa hi ka san sungah ka hmu dah lo, a tuṭum hi veikhatnak a si. Zokhal an hmu dah ve ding ka zum lo.

Ward -B khaan sung ih a nikhatnak

July thla thok ihsin mithi hi nikhat pakhat in an thi nawn lo ih ni kaan in an thi deuh, Falam ah Covid a tizia deuh thlang lam hnu a si. Ka lut ni a nikhatnak July 5 ah, mithi pakhat a rak um nan ka khelh man lo. Cuih sun cu thazaang um zet in ka mina ka kil thei ih Oxygen khal hlawp-tlo zetin ka bawh thei.

Zaan cu Oxygen bawh thawn, Kanu Tial a ih-hmu khop lo thawn a si ruangah kei cu it lo/ sing lo in ka um. Zinglam nazi 3 a lan ruahro cun it ka duh nan ka hneekawk. Hneekawk in khua vaang lawlaw ka tum, asinan thaisun le ka cawl thei cuang lo ding. Unau sungkhat pawl in in sawng thei lo ding ka tiih, meng lawlaw ka tum nawn loih zinglam nazi 4 luan hrawng tiang ka kil, cuhnu in zinglam khuavang nazi 6:30 tiang hrawng ka it sal. Covid minaa kil hi minaa dang kan kil ṭheu vek siloin, baang le it khop lo khal ah unau le sungkhat dang rak sawng a ngah lo ih veikhat lut le suak a ngah nawn lo, Suak ding a si khal le Swab check nak an nei ta ding ih nathrik nei cu suak sim hlah,a mah kha siizung to cih a si mai. Curuangah minaa kil hi thlengawk a um lo a si.

Nihnihnak

Zaankhatnak Nazi mal tuk lawng ka it ngah tikah a thaisun cu, ka tha a tlung thei lo, ka um a nuam thei lo. Sun ah mal te zau in it-that sehla ka duh tuk nan, it nak ding hmun a um lo. Plastic Tokham zaunak um mi pakhat kan khaan ah an taan ciami a um ih cutawk ah ka zau ih ka it tum, ka thin a thi thei lo. Malte rei lo ah Oxygen bawh a ṭul lala.

Kapu thawh le din ter a ṭul thawn, sun cu ka it thiam nawn lo. A ni hnih zaan khal zaankhatnak vek thotho in Oxygen bawh le minaa kil nak ah tuanten ka it ngah cuang lo. Zaan nazi 12 a luan, nazi 1/2 a kim cun It a hmu ruahro. Thaisun, tipsun, thiamsun khalah zo khal in ‘na baang’ tiah in rak sawng lo ding timi vun ruat ah Thin a pit sinsin, it-hmu khop lo thawn tha a nau cuahco.

Cutin zinglam nazi 4 kiangkap Oxygen bawh ṭheh in, oxygen thar ka hawp ter ih khua vang tiang ka it that sal. Cutivek in sun khal ah ka cawl thei nawn lo, zaan khal khopkham ka it thei lo, khuavaang tiang rori ka meng caan khal a um.
Curuangah zing tuanten ka tho thei nawn lo, Sayamah pawl an ra ih sii an dawt khal ka tho thei nawn lo. Ka mang vekin ka thei. Sayamah pawl hin mina kil pawl in theithiam tuk ve ih, minaa sii an dawtnak hnaihnok ko in kan um leh kan tho lo khalah simawk, kawkawk tivek an nei lo. Anmah ten a rem dandan in an rak dawt mei.

Siibawi le Sayamah pawl ih in zohkhen dan

Sayamah pawl hi zinglam nazi 7 hrawngah siidawt ding in in rak haal, cun nazi 10 kiangkap ah Siibawipi Dr. Tluang Cung Thang thawn in rak haal, cun zaanlam 7 kiangkap hrawng ah veikhat siidawt dingin in rak haal ringring. Cumicu pung-hman ih an tuahmi a si. A caan le Sibawipi le Sayama pawl PPE hnipuan hruk ṭulmi emergency an nei le an PPE phoih cih loin, minaa pawl in rak zoh cih bet. Cutiih in rak zohcih caan hicu pung-hman an tuah keel mi a si lo ruangah a nazi in sim a theih lo.

A caan le cutin vei 2 lai tla in rak haal, a caan le khua thim hnu khalah in rak haal. Siibawipi Dr. Tluang Cung Thang cun minaa pawl hi siivai kan ṭulmi lawng siloin thinlung lam thazaang nasazet in a rak pek. Minaa ṭong thei mi an sile an mah rori a biak ih, ‘na tha nau hlah, na dam ding’ tiah, an liang ah a kut ret in a sim ringring. A hrekkhat a to theimi tla cu an kiang ah a topi, a kuah ih thazaang a pek ringring.

Siibawipi hi Thantlang lammi a siih a Falam ṭong a hman tuk lo, a ṭong le Ṭaal le Thlanrawn ṭongvek deuh a pawt. A Falam ṭong thiamtawk in cu tha a pe ringring hai. Sayamah pawl khal hi an mah zoh caan lo, minaa laakhruak in an besia caan ah a sile Phone thawn kan ko ih, PPE hnipuan hruk in an ra.

Covid minaa pawl hi laakhruak in an besia caan ah an ṭulmi cu Oxygen lawng a si. Sayamah pawl cu kan ko, an ra khal le ziangti khalin an bawm thei ve lo. Mina kiltu kan thin a nuam deuh, kan thla a tlung tilawng a si. Sayamah pawl cun an thaw thawt nuam deuh ding hrang siidawt le an zaang cum sak lo baak tuah ding a um lo. Sayamah pawl hi PPE hnipuan thawn lawng an rak lut ringring ih, PPE hnipuan hi Ks.40000 lai a si tikah, veikhat an hruk le hlon cih a si. Pamhmai a um ti`n kan ruat cio ruangah besiatuk an um lo cun minaa kil pawl khalin kan ko tuk ve lem lo.

Unau sungkhat

Minaa laakhruak in an naa caan ah minaa kil pakhat le pakhat sawmaw ton in kan va bawmaw ton. Oxygen nasa zetin kan pek ih an thaw-thawt a hung nuam sal. Besia hruak minaa in a hawp ding mi Oxygen a cem thlang cun cuih minaa kil cu thin a pit thluh si mei. Vai a vuan thluh, mihrek in an zaang beng an rak bawm. Oxygen a cem a sile minaa kil cun Oxygen cawi dingah khaankhat hnu khaankhat hawl a si. Mihrekkhat in a hlei an nei pang le cawih awk a si. Cutin khat le khat zo khal thlah thlam awk men loin minaa kil pawl khal kan ṭang khawm tlang. Cutivek ih kan buai vialvial caan, Laakhruak ih besia hi Ward -B khaan sung ah nikhat ah a malbik vei 2/3 cu a um ringring.

Cutin khat le khat kan bawmawton nak ah minaa kil pawl hi kan nelawk thluh, unau sungkhat rualpi vekin kan zohawk thluh.

Ei-in le Sii-vai kan hman dan

Covid minaa pawl rawl in kuat le Ward -B ah an rak ret ih Sayamah te in in rak pek. Kan hmin an auh ih kan va laak. Kan sii ei mi a cem caan, Sii kan lei duh khal ah Sayamah pawl phone thawn kan biak ih an mah in Siizung dawr ah in va Baak sak. Siizung dawr ah mahten thil lei a theih lo ih, paisa rengreng khal keng an siang lo.

Zinglam thawhhlam khal hi Siizung ei-in dawr ah phone thawn cah men a si, an mah in sayamah te hnen an rak pek ih Sayamah te in in pek sin. Inn lam ih rawl khaih tu nei lo pawl khalin Siizung dawr ah an cah mei ṭheu.

Cutiih a baak in sii le ei-in kan laak mi pawl hi siizung kan suak zawn ah pek saal a si. Minaa hrang ih a ṭulmi sii le ṭukṭak thil, thi tahnak tivek, Spo2 tahnak tivek, Oxygen Flowmeter tivek, Para sii tivek, Thi-thlum sii tivek pawl, a ṭulmi ziangkim pawl hi Ward sung cabuai par ah an ret cia thluh ih mahten, mai ṭulṭul mi laak ih hman men a si.

Oxygen bawh

Oxygen hi nazi 2/3 dan in veikhat in rak pek. Veikhat in pek le durpi 4 an rak keng. Khalai fang hi Kawl lam ihsin Oxygen an phur thei lo laifang a siih siizung Oxygen cet lawng kan ring. Mina zate lakah Oxygen dur thawn pekawk tengteng ṭul mi hi mipum 10 luan kan um. A dang cu Oxygen cet te thawn pek theih le liter malte lawng hawp khal ngah mi an si. Cutikah dur 4 lawng cun, kan khopkham lo.

Curuangah cuhawk rori a siih, a caancaan ahcun a ṭultuk mi pawl hmaisa ah, nazi 2/3 hngak theih a si le neta ṭum ah tivek in kan tunawk ṭheu. Khopkham zet kan silo, daih fangfang kan si ruangah ziangtik kan Oxygen a cem ding? tuṭum ah teh kan ngah pei maw ti`n thin a phaang ringring.

Oxygen in peknak hi Ward-B dung lam in a si. Cuih sangkaa ihsin pi 10 tiang hrawng tianglawng suak a theih ih cutawk te ah Oxygen bawh in kan ding vialvial ṭheu. Tuṭum cu kei mah, nang cu hmaisa na laak zo, emergency tuk ruangah in kian hram uh, Sayamah te ka sim ter zo, kei Mangkuk le Tawipi (sun/zaan it loin Oxygen in thunsak, in pek tu)Phone in ka biak zo’ tiah kan tiaw celcel ringring. Culawng siloin cuih Sangkaa hram ahcun khat le khat thuhla ruahawknak le khat le khat hnemawknak kan hmangnak hmun khal a si cih.

Harsat dan

Veikhat sun cu minaa kil pawl thawn mai’ minaa kilmi dinhmun kan ruahawk lai ah minaa kil pakhat in ” A…. har…. tuk….., ka celh nawn lo. Leilung tlun ah a har bik a si ding” tiah a ti. Zokhal in kan el thei lo. Ward-B minaa kil hi a har tuk ngaingai. Kei khal cuih a ṭong ka ring ve. Tutiang ka hmuhton mi le ka ṭuan mi ah a har bik in ka thei ve. Zaan it thei lo, Oxygen bawh ṭul, Oxygen a cem pei maw ti`n thin a phaang ringring, cawl tihi a um thei lo, rawl ei kaa a thaw thei lo, thiṭha a tlung thei nawn lo, hih nat in kan mina a nehpang ding tiah kan ṭang ṭenṭo, minaa in le an tuar a har thluahthlo, thin le a pit. Thinlung taksak zaten tuar a si ruangah a…. har….. tuk…. ngai. Keikhal Leitlun ih a harbik ti hleilo baak sim ding ka thei ve lo.

Culawng silo minaa kil pakhat thotho cun, kan pahnih lawng kan tonawk lai ah, “A thoknak ah cu ka pa damnak rak pek hram aw tiah Pathian hnen thla ka cam. A sinan ka tuar nawn lo, tucu Pathian kan pahnih in kan nunnak in laak lawlaw aw tiah thla ka cam zo” tiah i sim. Cutiih i simtu hi a mah lawngin a pa a kil. A mah lawng in a ti thei nawn lo ruangah mi pahnih in minaa kil ding ah a rak dil ve, a zaanlam ihsin mi pahnih in an kil ve. Cuih thucu Kanu Tial ka ruah tikah, a nih khal in “kei khal ra lo awla cutin thla ka cam ve ko ding” tiah in tive.

Kan Ward ih minaa kilve Dr. Thian Pum an rak ra zaan ah mina besia 2/3 hrawng an um ih, mithi pakhat kan nei. A mah cun “hi lawmlam siding ka rak ruat baan lo. A rak besia tuk ual. Minaa sim lo a kiltu hman tha a nau thluh thei ual” tiah i ruah. Minaa besia thawn pehpar in hmuhtonnak tamzet neitu Siibawi pakhat hrang hman ah a zum`nak hnakin a rak besia ih thanau tlak tiang a si ati ruahro.
Minaa kil hrang hman ah a har tuk lawmlam, a minaa sinsin hrangah teh ziangtluk in a har sinsin pei. Ka ruat thiam lo….
A… har ….. tuk… rori a si…..

Ka phurhrit a zaang

Cuticun tuar thei lo le a har na cing in nikhat hnu nikhat a liam, zarhkhat luan kan um zo. July 14 zaanlam cu Kapu a besia deuh ve. Dr. Cung Sin Thawng Luai le Sayama pawl ih in tuamhlawmnak thawngin a hung ṭha deuh sal. A biak tla kan biakawk thei, asinan a ṭha cih lo, laakhruak in a besia phahphah, kan mahten kan ti thei tawk in kan tuamhlawm. Zaan khua a tlai deuhdeuh thin a pit deuhdeuh, ka pu cu laakhruak in a besia cingcing thotho. Cutikah Dr. Thian Pum hnen ṭhaten ka sut ih a nih khalin sup loin ṭhaten i sim ve. “A ngah nawn lo, asinan a thaw-thawt nuam deuh in a feh nuam ding hrangah Oxygen cu pek rero ko aw” tiah i sim.

Dr. Thian Pum ih i sim hnu cun, ka thinlung thup (မသိစိတ်) ih ka rak ṭang rero mi le ka taksa baang ih ka ṭaang rero mi pawl cu ka thlah thluh lawlaw. Ka pu hi a dam tengteng ding ti hnak in, a dam thei lo khal le a thih hlan sung ti theitawk in ka kil ding ka ti. Cutiih ka thinlung ka ṭhencat hnu in cu ka phurhrit a zaang curco. Ziangruangah cutiih ka ṭhencatnak men in ka phurhrit a zaang ticu ka thei awk lo. Ek pah zet mi thawh ṭheh vek rorin ka zaangawk.

Ward-B khaan ih Vancungmi

Dr. Thian Pum hi a pu kil ve ding ah Ward-B ah a rak um ve mi a si. Ward -B hi cutivek ih vansangnak hmun a si ko nan, thinlung taksa vansangnak zaangkhai deuh ding hrang minaa in zohbawm tu dingah Pathian in sii lam thiammi Sayamah le Siibawi a rak thlak ṭheu. Kan mah lawng siloin kan hlan khal ah an rak um ih kan hnu khal ah cutivek ih sii lam thiam Saya/Sayamah pawl an rak um bet ringring.

Ward -B kan um lai ah hin Sayamah Thian Boih, Sayamah Lydia le Dr. Thian Pum an rak um. A ṭul caan ah kan ko ih el siang loin in tuamhlawm, Emergency siidawt ṭul caan ah an mah in in dawt, in tuamhlawm. An mah pawl an um cun kan tha a tlung, kan hna a ngam tuk. Kan mah lawng silo Duty kai tu Sayamah te hrang khal ah an ṭhahnempi tuk. An hnen ah kan lungawi tuk. An pathum hi Pathian in kan hrang ah a thlahmi Vancungmi an si. Mina an tuamhlawm dan le an tawzaang dan hi sim ka duh zet nan, ka caa a sau deuh ruangah hi zat lawng si sung seh.

OT khaan ah kan ṭhawn

Ward-B ih kan um rero ahcun Kapu hi Oxygen khopkham kan pek thei lo ding tiih ka ruat ruangah, OT (Khuai-khan) ah ret dingin dilnak kan nei. Siibawipi khal in, ‘minaa besia a si ruangah kan ṭhawnnak ah a tuar thei lo pang le’ tiah Zawnruatnak in in ti nan, ṭhawn tengteng kan duh ruangah kan ṭhawn thotho. July 15 sun ah kan ṭhawn aw. Ni 11 sung kan umnak Ward -B cu kan taansan.

Mual in liamsan

Kapu cu OT (khuaikhaan) ah zaanhnih le sun thum kan tuamhlawm hnu July 17 sun ah mual in liam san. Milai kan sinak vekin kan sianglo tuk, ka riah a sia ve. A sinan, kan ti theitawk kan tuamhlawm, Pathian ih lairelnak a si tiah ka hnem awk.

July 3 in July 17 (ni 15 sung) tiang siizung kan um sungah Covid minaa Ward- B le OT khaan ihsin in liamsan tuhi Kapu tel in mipum 15 an si.

Siizung ihsin kan tlung

Minaa kil kan si ruangah nat kan ngah le ngah lo check dingah Kanu Tial thawn Swab check nak kan nei. Siizung kan um a zarhkhatnak ah in check zo ih culai khal ah Negative a siih Kapu in taansan ni kan check saal khalah Negative thotho a si. Curuangah siizung ihsin kan suak cih thei ih Kapu ruak vui nak ah kan thlun cih thei ve. Volunteer pawl in Kapu ruak cu an rak phur. Kan nih khal ruakphur mawṭaw dung ihsin Motorcycle thawn kan thlun cih ve. Ward-B dung lam ihsin kan feh.

Ward-B dung ih Oxygen kan bawhnak ah cun Ward-B kan um lai ih kan rualpi mina kil pawl cu Oxygen an rak bawh. Ruakphur mawṭaw an hmai ihsin a lan ruahro an hmu, “zo si… zo si…” tiah an mang a bang cih ko ding. Cuih mawṭaw dung ihsin kan thlun tikah hmakhatten in hmu cih. Motorcycle thawn kan si ruangah thuhla sutawknak le biakawknak caan a um lo. Asinan an mithmai in thu in sut duh ti a lang. Zaangfahnak le tuarpinak mithmai cun in zoh. Keikhal an mithmai ih thusutnak cu, ka lu sut in ka sawn ve hai.

Ṭong le biakawk ciamco ṭul lo…. kan theithiam awk….. Cutiih ka rualpi pawl thawn mithmai zohawk in kan biakawk lai ah, Ka thinlung sungten ka rualpi pawl cu ka seherh tuk hai. Ziangah tile Ward -B khaan sung ih harsatnak, thinbaangnak, leilung tlun ih harsabik le thih duh tiang ih harsatnak pawl cu an tuar hrih ding ti ka thei ruangah ka seherh tuk hai…..

Nehhnu, hih Ward ah thleng nawn hram lo dingah le hih Ward-B ah minaa kil ṭul nawn lo dingin siseh, ziangvek ih misual/ i hua tu/ ka hua mi/ ka raal pawl khal hih Ward-B ah um ṭul le minaa kil ṭul lo dingin Pathian in rak umpi hram seh tiah thinlung tak muril sung in thlacam phah thawn
Ward-B le Falam siizungpi cu ….
July 17 ni Sunhnu nazi 2 ihsin….
Kapu ruak tlun cih in ….
kan taan san ta….

(Siizung ah minaa kil in ka um sung ka tonteh mi pawl Nunthuleng Tawi in ka run ngan sal a si – Semuel Lian)

Leave a Reply

Your email address will not be published. Required fields are marked *